DESK MARATHI NEWS NETWORK.
मुंबई/प्रतिनिधी – देशभरातील रेल्वे स्थानकांवरील प्रवासी सुविधा आणि स्वच्छतेबाबत नियंत्रक आणि महालेखापरीक्षक अर्थात ‘कॅग’च्या अहवालातून गंभीर बाबी समोर आल्या आहेत. देशातील तब्बल ५१२ रेल्वे स्थानकांची पाहणी करण्यात आली असून, त्यापैकी ४१२ स्थानकांवर मूलभूत सुविधांचा अभाव आढळून आल्याचे अहवालात नमूद करण्यात आले आहे. यामध्ये कल्याणसह विविध महत्त्वाच्या रेल्वे स्थानकांचा समावेश असल्याने प्रवाशांच्या आरोग्य आणि सुरक्षिततेचा प्रश्न ऐरणीवर आला आहे.
रेल्वे स्थानकांवर प्रवाशांसाठी उपलब्ध करून दिल्या जाणाऱ्या पिण्याच्या पाण्याच्या गुणवत्तेबाबतही धक्कादायक निरीक्षणे नोंदविण्यात आली आहेत. काही स्थानकांवरील पाण्याच्या नमुन्यांमध्ये ई-कोलाय (E. coli) जीवाणू आढळून आले. मानवी आणि प्राण्यांच्या विष्ठेमध्ये आढळणाऱ्या या जीवाणूंची पाण्यात उपस्थिती ही पाणी दूषित असल्याचे निदर्शक मानली जाते.
रेल्वे स्थानकांवर दररोज हजारो प्रवाशांची ये-जा होत असते. अशा परिस्थितीत पिण्याचे पाणी दूषित आढळणे ही अत्यंत गंभीर बाब आहे. प्रवाशांना स्वच्छ आणि सुरक्षित पिण्याचे पाणी उपलब्ध करून देणे ही रेल्वे प्रशासनाची मूलभूत जबाबदारी आहे.‘कॅग’च्या तपासणीत केवळ पाण्याची गुणवत्ता नव्हे, तर स्वच्छता, पिण्याच्या पाण्याची उपलब्धता आणि इतर मूलभूत प्रवासी सुविधांमध्येही त्रुटी आढळून आल्या आहेत. त्यामुळे रेल्वे प्रशासनाने स्थानकांवरील सुविधांची नियमित तपासणी करून त्रुटी तातडीने दूर करण्याची गरज अधोरेखित झाली आहे.
विशेषतः पिण्याच्या पाण्याच्या गुणवत्तेची नियमित आणि काटेकोर तपासणी करावी, दूषित पाण्याचे स्रोत तातडीने बंद करून पर्यायी सुरक्षित पाणी उपलब्ध करून द्यावे, तसेच स्थानकांवरील मूलभूत सुविधांकडे गांभीर्याने लक्ष द्यावे, अशा सूचना ‘कॅग’ने रेल्वेला केल्या आहेत.
कल्याणसारख्या मोठ्या आणि वर्दळीच्या रेल्वे स्थानकावर दररोज मोठ्या संख्येने प्रवासी ये-जा करतात. त्यामुळे ‘कॅग’च्या अहवालातील निरीक्षणांच्या पार्श्वभूमीवर कल्याण रेल्वे स्थानकावरील पिण्याच्या पाण्याची गुणवत्ता आणि प्रवासी सुविधांची प्रशासनाने तातडीने तपासणी करावी, अशी मागणी प्रवाशांकडून होण्याची शक्यता आहे.
