DESK MARATHI NEWS NETWORK.
डोंबिवली/प्रतिनिधी – वाढदिवसाच्या शुभेच्छांसाठी शहरभर फ्लेक्स, बॅनर आणि होर्डिंग्स लावण्याची प्रथा पाहायला मिळते. मात्र, या जाहिरातींमुळे शहराच्या सौंदर्यावर परिणाम होण्यासोबतच नागरिकांना वाहतूक कोंडीसह विविध अडचणींचा सामना करावा लागतो. त्यामुळे आपल्या वाढदिवसानिमित्त कुणीही फ्लेक्स, बॅनर किंवा होर्डिंग्स लावू नयेत, असे आवाहन मनसे नेते राजू रतन पाटील यांनी केले आहे.
राजू पाटील यांचा वाढदिवस २६ सप्टेंबर रोजी आहे. त्यांच्या वाढदिवसानिमित्त दरवर्षी मोठ्या प्रमाणात शुभेच्छा फलक लावले जातात. मात्र, यंदा स्वतः राजू पाटील यांनीच समर्थक, मनसैनिक, स्नेही आणि मित्रपरिवाराला हे फलक न लावण्याचे आवाहन केले आहे.
सोशल मीडिया पोस्टच्या माध्यमातून त्यांनी आपली भूमिका स्पष्ट केली. ज्या जनतेच्या प्रेमावर आणि पाठिंब्यावर आपण उभे आहोत, त्याच जनतेला त्रास देऊन मिळालेल्या शुभेच्छा मनाला पटत नाहीत, असे राजू पाटील यांनी म्हटले आहे.
तसेच वाढदिवसाच्या शुभेच्छा नक्की द्या; मात्र त्या डिजिटल माध्यमातून, फोन किंवा मेसेजद्वारे द्याव्यात, अशी विनंती त्यांनी केली आहे.
राजू पाटील यांना मानणारा तरुण वर्ग मोठ्या प्रमाणात असून, महाराष्ट्रातील विविध भागांत त्यांचा चाहतावर्ग आहे. त्यामुळे त्यांच्या या आवाहनाला समर्थकांकडून किती प्रतिसाद मिळतो, याकडे लक्ष लागले आहे.
शहर सुंदर, स्वच्छ आणि सुटसुटीत ठेवण्यासाठी वाढदिवसानिमित्त फ्लेक्स, बॅनर आणि होर्डिंग्स न लावता सहकार्य करावे, अशी अपेक्षा राजू पाटील यांनी व्यक्त केली आहे.
