DESK MARATHI NEWS NETWORK.
कल्याण/प्रतिनिधी – कल्याण पश्चिमेतील वाडेकर परिसरात पाळीव कुत्र्याने एका चिमुकल्याला चावा घेतल्याची धक्कादायक घटना समोर आली आहे. साई शरण इमारतीमध्ये घडलेली ही घटना इमारतीतील सीसीटीव्ही कॅमेऱ्यात कैद झाली आहे. या घटनेमुळे परिसरातील रहिवाशांमध्ये भीतीचे वातावरण निर्माण झाले आहे.
सीसीटीव्हीमध्ये चिमुकल्यावर कुत्र्याने हल्ला केल्याचे दृश्य कैद झाले असून, या घटनेनंतर लहान मुलांच्या सुरक्षिततेचा प्रश्न पुन्हा एकदा ऐरणीवर आला आहे. परिसरात पाळीव कुत्रे फिरत असताना त्यांच्यापासून लहान मुलांना धोका निर्माण होऊ नये, यासाठी आवश्यक खबरदारी घेण्याची मागणी रहिवाशांकडून होत आहे.
कल्याण-डोंबिवली परिसरात कुत्र्यांच्या हल्ल्याच्या घटना सातत्याने समोर येत असल्याने नागरिकांमध्ये चिंता वाढली आहे. पाळीव कुत्र्यांबाबत असलेले नियम, लसीकरण आणि सुरक्षिततेच्या उपाययोजनांचे काटेकोर पालन केले जात आहे की नाही, याची प्रशासनाने तपासणी करावी, अशी मागणी स्थानिक रहिवाशांनी केली आहे.
दरम्यान, अशा घटना पुन्हा घडू नयेत यासाठी महापालिका प्रशासनाने तातडीने लक्ष घालून आवश्यक उपाययोजना कराव्यात. विशेषतः लहान मुले आणि ज्येष्ठ नागरिकांच्या सुरक्षिततेसाठी परिसरातील नागरिकांमध्ये जनजागृती करण्याबरोबरच पाळीव प्राण्यांच्या मालकांनीही आवश्यक नियमांचे पालन करावे, अशी मागणी होत आहे.
