DESK MARATHI NEWS NETWORK.
कल्याण /प्रतिनिधी – छठपूजेनिमित्त मध्य रेल्वे प्रशासनाने महाराष्ट्राबाहेरील राज्यांसाठी तब्बल ४१८ विशेष मेल-एक्स्प्रेस गाड्या सोडण्याची घोषणा केली आहे. मात्र, दररोज लाखो प्रवाशांची वाहतूक करणाऱ्या कसारा-कर्जत मार्गावर वाढीव लोकल सुरू करण्याच्या मागणीकडे रेल्वे प्रशासन दुर्लक्ष करत असल्याचा आरोप कल्याण-कसारा-कर्जत रेल्वे प्रवासी संघटनेने केला आहे. परराज्यांसाठी विशेष गाड्या उपलब्ध करून देताना लोकल प्रवाशांच्या मागण्यांकडे दुर्लक्ष होत असल्याने संघटनेने रेल्वे प्रशासनाच्या भूमिकेचा तीव्र निषेध केला आहे.कल्याण-कसारा-कर्जत रेल्वे प्रवासी संघटनेने यासंदर्भात मध्य रेल्वेच्या विभागीय रेल्वे व्यवस्थापकांशी पत्रव्यवहार केला आहे. छठपूजेनिमित्त विशेष गाड्या सोडण्याच्या निर्णयाचे आम्ही स्वागत करतो. मात्र, दररोज १० लाखांहून अधिक प्रवास करणाऱ्या कसारा-कर्जत विभागातील नियमित प्रवाशांच्या समस्यांकडेही रेल्वेने लक्ष द्यावे, अशी मागणी संघटनेचे अध्यक्ष राजेश घनघाव यांनी केली आहे.
एका बाजूला उत्सवाच्या काळात ४१८ विशेष गाड्या चालविण्यासाठी रेल्वेकडे इंजिन, डबे, कर्मचारी आणि मार्ग उपलब्ध होतात; मात्र दररोज प्रवास करणारे नोकरदार, विद्यार्थी, रुग्ण आणि त्यांच्या नातेवाईकांसाठी १० ते १२ वाढीव लोकल सुरू करण्याबाबत रेल्वे प्रशासनाची उदासीनता का, असा सवाल संघटनेने उपस्थित केला आहे. ही भूमिका महाराष्ट्रातील नियमित लोकल प्रवाशांवर अन्याय करणारी असल्याचा आरोप घनघाव यांनी केला.
१६ वर्षांत एकही वाढीव लोकल नाही
२०१० पासून कसारा आणि कर्जत मार्गावर एकही वाढीव लोकल सुरू करण्यात आलेली नाही, असा दावा प्रवासी संघटनेने केला आहे. त्याचवेळी विशेष ट्रेनच्या नावाखाली गेल्या १६ वर्षांत १०० पेक्षा अधिक मेल-एक्स्प्रेस गाड्या वाढविण्यात आल्याकडे संघटनेने लक्ष वेधले आहे. दरवर्षी सण-उत्सवांच्या काळात विशेष गाड्या वाढवल्या जातात; मात्र नियमित लोकल सेवेत अपेक्षित वाढ होत नसल्याने प्रवाशांना गर्दीचा सामना करावा लागत असल्याचे संघटनेचे म्हणणे आहे.
किमान १२ वाढीव लोकलची मागणी
कसारा आणि कर्जत विभागातील तिसऱ्या आणि चौथ्या मार्गिकेचे काम सुरू होऊन सुमारे १० वर्षे झाली आहेत. हे काम पूर्ण होण्यासाठी आणखी दोन वर्षे लागण्याची शक्यता असल्याने तोपर्यंत प्रवाशांना गर्दीतून प्रवास करण्यास भाग पाडू नये, अशी मागणी संघटनेने केली आहे.
सकाळच्या वेळेत कसारा ते सीएसएमटी आणि संध्याकाळी सीएसएमटी ते कसारा तसेच कर्जत मार्गावर किमान १२ वाढीव लोकल सुरू कराव्यात, अशी मागणी करण्यात आली आहे.रेल्वे प्रशासनाने १ नोव्हेंबरपर्यंत वाढीव लोकल सुरू केल्या नाहीत, तर १ डिसेंबर रोजी सनदशीर मार्गाने आंदोलन करण्यात येईल, असा इशारा कल्याण-कसारा-कर्जत रेल्वे प्रवासी संघटनेने दिला आहे
