DESK MARATHI NEWS NETWORK.
कल्याण/प्रतिनिधी _मुंबई पोलिसांच्या वाहतूक विभागात कार्यरत असलेल्या पोलिस कर्मचाऱ्याची ३५० क्लासिक बुलेट कल्याण रेल्वे स्टेशन परिसरातील तहसीलदार कार्यालयाबाहेरील फुटपाथवरून चोरीला गेल्याची घटना समोर आली आहे. विशेष म्हणजे, बुलेट चोरीचा प्रकार परिसरातील सीसीटीव्ही कॅमेऱ्यात कैद झाला आहे. मात्र, चोरीला गेलेल्या बुलेटचा अद्याप पोलिसांना शोध लागलेला नाही.
आशिष बळीराम निघोट हे मुंबई पोलिसांच्या वाहतूक विभागात कार्यरत आहेत. २३ जुलै २०२६ रोजी त्यांनी त्यांची ३५० क्लासिक बुलेट कल्याण स्टेशन परिसरात, कोर्टासमोरील रस्त्यालगत तहसीलदार कार्यालयाबाहेरील फुटपाथवर उभी केली होती. काही वेळाने ते परत आले असता त्यांची बुलेट जागेवर नसल्याचे निदर्शनास आले.
यानंतर निघोट यांनी कल्याण येथील एमएफसी पोलिस ठाण्यात तक्रार दाखल केली. या प्रकरणी २३ जुलै रोजी एफआयआर दाखल करण्यात आला आहे. परिसरातील सीसीटीव्ही फुटेजमध्ये बुलेट चोरीचा प्रकार कैद झाला असून, त्याआधारे पोलिसांकडून चोरट्याचा शोध घेण्याचे प्रयत्न सुरू आहेत.
मुंबई पोलिसांच्या वाहतूक विभागात कार्यरत असलेल्या कर्मचाऱ्याचीच बुलेट दिवसाढवळ्या गर्दीच्या कल्याण स्टेशन परिसरातून चोरीला गेल्याने परिसरातील वाहनांच्या सुरक्षेचा प्रश्न पुन्हा ऐरणीवर आला आहे. चोरीला गेलेल्या बुलेटचा अद्याप तपास लागला नसल्याने पोलिसांच्या तपासाकडे सर्वांचे लक्ष लागले आहे.
