DESK MARATHI NEWS NETWORK.
डोंबिवली/प्रतिनिधी -इंदोर-पुणे एक्सप्रेसच्या एसी कोचमधून महिला प्रवाशाची लॅपटॉप, आयफोन, महत्त्वाची कागदपत्रे आणि इतर साहित्य असलेली बॅग चोरी करून, तिच्या एटीएम कार्डचा वापर करत तब्बल 80 हजार रुपये काढल्याप्रकरणी डोंबिवली जीआरपी पोलिसांनी गुजरातमधील दोन आरोपींना अटक केली आहे. विशेष म्हणजे दोन्ही आरोपींचे नाव मुकेश पुरोहित असून, त्यांची नावे मुकेश कांतीलाल पुरोहित आणि मुकेश राज पुरोहित अशी आहेत. या प्रकरणातील आणखी एका संशयिताचा पोलीस शोध घेत आहेत.
इंदोर-पुणे एक्सप्रेसमधून प्रवास करणारी महिला वसई आणि भिवंडीदरम्यान झोपेतून उठल्यानंतर तिची बॅग गायब असल्याचे तिच्या निदर्शनास आले. बॅगेमध्ये आयफोन, लॅपटॉप, महत्त्वाची कागदपत्रे आणि इतर साहित्य होते. याप्रकरणी महिलेने डोंबिवली जीआरपी पोलीस ठाण्यात तक्रार दाखल केली.
तक्रार मिळताच पोलिसांनी तपास सुरू केला. तपासादरम्यान चोरीला गेलेल्या एटीएम कार्डचा वापर झाल्याचे पोलिसांच्या निदर्शनास आले. या कार्डच्या माध्यमातून तब्बल 80 हजाररुपये काढण्यात आल्याचे समोर आले. पैसे ज्या एटीएममधून काढण्यात आले, त्याची माहिती मिळवत पोलिसांनी तपासाची दिशा निश्चित केली.
तपासाच्या आधारे पोलिसांनी मुकेश कांतीलाल पुरोहित आणि मुकेश राज पुरोहित यांना ताब्यात घेतले. चौकशीत त्यांनी महिलेची बॅग एसी कोचमधून चोरी केल्याची कबुली दिल्याची माहिती पोलिसांनी दिली आहे.
दोन्ही आरोपी गुजरातमधील एका मोबाईल दुकानात काम करत असून, मोबाईलशी संबंधित साहित्य खरेदी करण्यासाठी मुंबईला आल्याची माहिती समोर आली आहे. प्रवासादरम्यान त्यांनी इंदोर-पुणे एक्सप्रेसमधून महिलेची बॅग चोरी केल्याचा आरोप आहे. त्यानंतर चोरीच्या एटीएम कार्डचा वापर करून 80 हजार रुपये काढण्यात आल्याचे तपासात निष्पन्न झाले.
डोंबिवली जीआरपी पोलिसांनी दोन्ही आरोपींना कल्याण रेल्वे न्यायालयात हजर केले असता न्यायालयाने त्यांना 4 सप्टेंबरपर्यंत पोलीस कोठडी सुनावली आहे. या गुन्ह्यात आणखी एक व्यक्ती सहभागी असल्याचा संशय असून, पोलिसांकडून त्याचा शोध सुरू आहे. प्रकरणाचा पुढील तपास डोंबिवली जीआरपी पोलीस करत आहेत.
