DESK MARATHI NEWS NETWORK.
कल्याण/प्रतिनिधी – भारतीय शास्त्रीय संगीताची समृद्ध गुरुकुल परंपरा जपत गुरु-शिष्य नात्यातील संस्कार पुढील पिढीपर्यंत पोहोचविण्याच्या उद्देशाने कल्याणातील ‘गुरुकुल प्रतिष्ठान’तर्फे ‘परंपरा’ या बासरीवादन विशेष सांगीतिक सोहळ्याचे आयोजन करण्यात आले आहे. सुप्रसिद्ध बासरीवादक प्रशांत बनिया यांच्या मार्गदर्शनाखाली होणाऱ्या या कार्यक्रमात त्यांच्या ७० हून अधिक शिष्यांकडून आपल्या गुरूंना अनोखी स्वरवंदना अर्पण केली जाणार आहे.
रविवार, ३० ऑगस्ट २०२६ रोजी सकाळी १० वाजल्यापासून कल्याणमधील के. सी. गांधी हायस्कूलच्या ऑडिटोरियममध्ये हा सांगीतिक सोहळा रंगणार आहे. तीन पिढ्यांच्या गुरु-शिष्य परंपरेचे दर्शन घडविणाऱ्या या कार्यक्रमात ७० हून अधिक बासरीवादक विविध राग, रागाधारित रचना तसेच सिनेसंगीताची सुरेल गुंफण सादर करणार आहेत.
या कार्यक्रमाचे विशेष आकर्षण म्हणजे प्रशांत बनिया यांचे गुरू आणि विख्यात बासरीवादक पंडित विवेक सोनार यांची विशेष प्रस्तुती. त्यांच्या बासरीवादनाला प्रसिद्ध तबलावादक उस्ताद फजल कुरेशी तबल्याची साथ करणार आहेत. यासोबतच प्रशांत बनिया यांचे एकल बासरीवादनही रसिकांना अनुभवता येणार आहे.
गुरु-शिष्य परंपरेतील नात्याचे विविध पैलू आणि भारतीय शास्त्रीय संगीताची साधना यांचा सुरेल आविष्कार या कार्यक्रमातून रसिकांसमोर येणार आहे. केवळ परंपरा जपणे नव्हे, तर ती नव्या पिढीच्या मनात रुजविण्याचा प्रयत्न या उपक्रमातून केला जात आहे.या सांगीतिक सोहळ्याला प्रवेश विनामूल्य असून संगीतप्रेमींनी मोठ्या संख्येने उपस्थित राहून तीन पिढ्यांच्या बासरीवादकांची ही अनोखी स्वरवंदना अनुभवावी, असे आवाहन गुरुकुल प्रतिष्ठानतर्फे करण्यात आले आहे.
