केडीएमसीच्या सात प्रभागांतील स्वच्छता कर्मचाऱ्यांना सुमीत एलकोप्लास्टचा दिवाळी बोनस; २१ हजारांपेक्षा अधिक वेतनधारकांनाही लाभ

DESK MARATHI NEWS NETWORK
कल्याण/प्रतिनिधी- कल्याण-डोंबिवली महानगरपालिकेच्या सात प्रभागांमध्ये घनकचरा व्यवस्थापन आणि कचरा संकलनाचे काम करणाऱ्या सुमीत एलकोप्लास्ट कल्याण एसएमडब्ल्यू प्रायव्हेट लिमिटेड कंपनीने आपल्या पात्र कर्मचाऱ्यांना दिवाळीची भेट दिली आहे. कंपनीच्या वतीने आर्थिक वर्ष २०२५-२६ चा वार्षिक बोनस ४ नोव्हेंबर २०२६ रोजी कर्मचाऱ्यांच्या बँक खात्यात जमा करण्यात आला आहे. विशेष म्हणजे, २१ हजार रुपयांपेक्षा अधिक वेतन असलेल्या कर्मचाऱ्यांनाही बोनसचा लाभ देण्यात आल्याने कर्मचाऱ्यांमध्ये समाधान व्यक्त होत आहे.
कल्याण-डोंबिवली शहरातील स्वच्छता आणि घनकचरा व्यवस्थापनाची महत्त्वाची जबाबदारी पार पाडणाऱ्या कर्मचाऱ्यांच्या मेहनतीची दखल घेत कंपनी व्यवस्थापनाने हा निर्णय घेतला आहे. शहरातील विविध प्रकल्प टप्प्याटप्प्याने सुरू झाल्यामुळे कर्मचाऱ्यांच्या रुजू होण्याच्या तारखेनुसार आणि प्रत्यक्ष सेवाकालावधीनुसार बोनसची रक्कम निश्चित करून वितरित करण्यात आली आहे.
या बोनस वितरणाचे आणखी एक वैशिष्ट्य म्हणजे, बोनसचा लाभ केवळ २१ हजार रुपयांपर्यंत वेतन असलेल्या कर्मचाऱ्यांपुरता मर्यादित न ठेवता त्यापेक्षा अधिक वेतन असलेल्या कर्मचाऱ्यांनाही देण्यात आला आहे. त्यामुळे कंपनीच्या विविध विभागांमध्ये कार्यरत असलेल्या कर्मचाऱ्यांना दिलासा मिळाला आहे.
कंपनी व्यवस्थापनाने दिलेल्या माहितीनुसार, बोनसचे वितरण बोनस देयक अधिनियम १९६५, वेतन संहिता २०१९ मधील लागू तरतुदी, कंपनीचे मंजूर धोरण आणि पात्रता निकष विचारात घेऊन करण्यात आले आहे. कर्मचाऱ्यांनी आपली वेतन नोंद तपासून बोनसची रक्कम जमा झाली आहे की नाही, याची खात्री करावी. काही तफावत किंवा शंका असल्यास कंपनीच्या मानव संसाधन विभागाशी संपर्क साधण्याचे आवाहन करण्यात आले आहे.
आर्थिक वर्ष २०२५-२६ मध्ये सुमीत एलकोप्लास्टमध्ये रुजू होण्यापूर्वी जे कर्मचारी अन्य कंपन्यांमध्ये कार्यरत होते, अशा कर्मचाऱ्यांनी त्यांच्या मागील कंपनीशी संपर्क साधून दिवाळी बोनसबाबत विचारणा करावी, असेही व्यवस्थापनाने स्पष्ट केले आहे. संबंधित आर्थिक वर्षात सुमीत एलकोप्लास्टमध्ये कार्यरत असलेल्या पात्र कर्मचाऱ्यांना कंपनीच्या वतीने बोनस देण्यात आल्याचे व्यवस्थापनाने सांगितले.
कल्याण-डोंबिवली शहर स्वच्छ ठेवण्यासाठी प्रत्यक्ष रस्त्यावर उतरून काम करणाऱ्या स्वच्छता कर्मचाऱ्यांचे योगदान महत्त्वपूर्ण आहे. त्यांच्या मेहनतीचा सन्मान आणि कर्मचारी कल्याणाला प्राधान्य देण्याच्या भूमिकेतून बोनस वितरित करण्यात आल्याचे कंपनी व्यवस्थापनाने म्हटले आहे. कंपनीच्या या निर्णयामुळे सात प्रभागांतील स्वच्छता कर्मचाऱ्यांची दिवाळी अधिक आनंदात साजरी होण्यास मदत झाली आहे.

दुष्काळग्रस्त शेतकऱ्यांच्या मदतीसाठी कल्याणमध्ये दिवाळी पहाट,१० नोव्हेंबरला रंगणार सुरांची मैफल