DESK MARATHI NEWS NETWORK.
डोंबिवली/प्रतिनिधी – डोंबिवली पूर्व आणि पश्चिमेला जोडणाऱ्या जोशी स्कूलजवळील पुलाचा ९० फूट रस्त्याकडे उतरणारा आर्म गेल्या अनेक वर्षांपासून जमीन अधिग्रहणाच्या प्रक्रियेमुळे रखडला आहे. त्यामुळे या पुलाचा पूर्ण क्षमतेने वापर नागरिकांना करता येत नसून, परिसरातील वाहतूक व्यवस्थेवरही त्याचा परिणाम होत आहे. रखडलेले जमीन अधिग्रहण तातडीने पूर्ण करून पुलाचा प्रलंबित आर्म लवकरात लवकर वाहतुकीसाठी खुला करावा, अशी मागणी कल्याण-डोंबिवली महानगरपालिकेच्या महासभेत नगरसेवक दिपेश पुंडलिक म्हात्रे आणि नगरसेविका खुशबू चौधरी यांनी केली.
जोशी स्कूलजवळील हा पूल डोंबिवली पूर्व आणि पश्चिमेला जोडणारा महत्त्वाचा दुवा आहे. मात्र, ९० फूट रस्त्याकडे जाणारा आर्म अद्याप पूर्ण न झाल्याने नागरिकांना पर्यायी मार्गांचा वापर करावा लागत आहे. परिणामी प्रवासाचा वेळ वाढण्याबरोबरच परिसरातील वाहतूक कोंडीची समस्याही गंभीर होत आहे.
जमीन अधिग्रहणाशी संबंधित प्रलंबित बाबी तातडीने मार्गी लावून पुलाच्या आर्मचे काम पूर्ण करण्यासाठी प्रशासनाने ठोस पावले उचलावीत, अशी आग्रही मागणी दिपेश म्हात्रे आणि खुशबू चौधरी यांनी महासभेत केली.
या मागणीची दखल घेत महापौर आणि महापालिका आयुक्तांनी संबंधित विभागांची तातडीने बैठक घेऊन जमीन अधिग्रहणासह पुलाच्या कामातील अडचणी दूर करण्यासाठी कार्यवाही करण्याचे निर्देश दिले. तसेच पुलाचे रखडलेले काम शक्य तितक्या लवकर पूर्ण करण्याच्या सूचना प्रशासनाला देण्यात आल्या.
९० फूट रस्त्याकडे जाणारा आर्म पूर्ण झाल्यानंतर डोंबिवली पूर्व-पश्चिम वाहतूक अधिक सुरळीत होण्यास मदत होणार आहे. तसेच नागरिकांचा प्रवासाचा वेळ कमी होऊन परिसरातील वाहतूक कोंडीवरही काही प्रमाणात नियंत्रण मिळवता येणार आहे.
अनेक वर्षांपासून प्रलंबित असलेल्या या महत्त्वपूर्ण कामाला आता प्रशासनाने प्राधान्य देऊन जमीन अधिग्रहणाची प्रक्रिया आणि इतर तांत्रिक अडचणी तातडीने दूर कराव्यात, अशी अपेक्षा नगरसेवक दिपेश पुंडलिक म्हात्रे आणि नगरसेविका खुशबू चौधरी यांनी व्यक्त केली.
