नेशन न्यूज मराठी टीम.
ठाणे/प्रतिनिधी – भारत निवडणूक आयोगाच्या निर्देशानुसार, दि. ०१ जानेवारी, २०२४ या अर्हता दिनांकावर आधारित छायाचित्रासह मतदार यादीचा विशेष संक्षिप्त पुनरीक्षण कार्यक्रम घोषित केला आहे. मतदार यादी पुनरिक्षणासाठी जिल्ह्यातील ५३२७ मतदान केंद्रस्तरीय अधिकारी (बीएलओ) मार्फत दि. २१ जुलै, २०२३ पासून ते दि.२१ ऑगस्ट, २०२३ या कालावधीत घरोघरी भेटी देऊन मतदारांची पडताळणी करण्याची मोहिम राबविण्यात येणार आहे. या मोहिमेअंतर्गत नवमतदार युवा, युवतींनी तसेच मतदार यादीत नाव नसलेल्या नागरिकांनी तातडीने नाव नोंदणीसाठी अर्ज करण्याचे आवाहन जिल्हा निवडणूक अधिकारी अशोक शिनगारे यांनी केले आहे.
निवडणुका न्याय व पारदर्शक वातावरणात पार पाडण्यासाठी मतदार याद्यांचे अद्यावतीकरण अत्यंत महत्वपूर्ण असते. १७ आक्टोबर २०२३ रोजी मुख्य निवडणूक अधिकारी कार्यालयाच्या संकेतस्थळावर आणि मतदार नोंदणी कार्यालयांमध्ये प्रारूप मतदार यादी प्रकाशित केली जाईल. निवडणूक आयोगाने निवडणूक तयारीच्या पार्श्वभूमीवर एका बाजूने मतदार यादी पुनरिक्षण तर दुसरीकडे जिल्हापातळीवर मतदान यंत्र तपासणीचे काम सुरू केले आहे. मतदार यादी पुनरिक्षणासाठी जिल्ह्यातील ५३२७ मतदान केंद्रस्तरीय अधिकारी (बीएलओ) मार्फत दि. २१ जुलै, २०२३ पासून ते दि.२१ ऑगस्ट, २०२३ या कालावधीत घरोघरी भेटी देऊन मतदारांची पडताळणी करण्याची मोहिम राबविण्यात येणार आहे. सदर मोहिमेअंतर्गत ८० वर्षावरील मतदारांची यादी तयार करणे, मृत मतदारांचा मृत्यु दाखला घेऊन त्यांचे नाव यादीतून वगळणे, स्थलांतरित कुटूंबांकडून फॉर्म भरून घेणे, १८ वर्षे पूर्ण झालेल्या मुलामुलींचे नवीन मतदार नोंदीसाठी फॉर्म भरून घेणे इ. कामे करण्यात येणार आहेत.
दि. १ जानेवारी, दि. १ एप्रिल, दि. १ जुलै आणि दि. १ ऑक्टोबर २०२३ रोजी ज्या नागरिकांचे वय वर्षे अठरा पूर्ण असेल त्यांना दि. १७ ऑक्टोंबर, २०२३ ते दि. ३० नोव्हेंबर २०२३ या विशेष मोहिमे अंतर्गत आगाऊ मतदार नोंदणी करता येणार आहे.
मतदारांनी आपले नाव, पत्ता, जन्मदिनांक, वय, ओळखपत्र क्रमांक, मतदार संघ इ. तपशील मतदार यादीत तपासून ते अचूक आहेत का याची खात्री करणे आवश्यक आहे. बरेचदा ऐन मतदानाच्या दिवशी आपले नाव मतदार यादीत नाही, अशी तक्रार अनेक मतदारांकडून केली जाते. त्यामुळे मतदारांनी प्रारूप मतदार यादीतील आपले तपशील आत्ताच तपासणे महत्त्वाचे आहे. या तपशिलातील दुरूस्ती फॉर्म नंबर ८ भरून या मोहिमेंतर्गत करता येईल. तसेच नवमतदार नोंदणीची विशेष मोहिमही राबविण्यात येणार आहे. विशेष करून दिव्यांग, तृतीयपंथी, महिला मतदारांच्या नोंदणीवर भर देण्यात येईल. महाविद्यालयांमध्येही १८ वर्षे पूर्ण झोलेल्या युवक व युवतीचे प्रबोधन करून मतदार नोंदणी करण्याचे आवाहन जिल्हा निवडणूक अधिकारी अशोक शिनगारे यांनी केले आहे.
