डोंबिवलीत शारदीय नवरात्रोत्सवाच्या सांस्कृतिक कार्यक्रमांना दिमाखात सुरुवात,खासदार डॉ. श्रीकांत शिंदे यांची मुख्य उपस्थिती

डोंबिवली/प्रतिनिधी -आपल्या सुरेल, भावपूर्ण आणि वैशिष्ट्यपूर्ण गायकीने रसिकांच्या मनावर अधिराज्य गाजवणारे सुप्रसिद्ध गायक राहुल देशपांडे यांच्या बहारदार संगीत मैफलीने डोंबिवलीतील शारदीय नवरात्रोत्सवाच्या सांस्कृतिक कार्यक्रमांचा आज दिमाखात शुभारंभ झाला. डोंबिवली पूर्व येथील डी.एन.सी. शाळेच्या मैदानावर आयोजित या संगीत सोहळ्याला कल्याण लोकसभा मतदारसंघाचे खासदार डॉ. श्रीकांत एकनाथ शिंदे यांची प्रमुख उपस्थिती लाभली. राहुल देशपांडे यांच्या सुरेल सादरीकरणाने संपूर्ण वातावरण संगीतमय झाले, मोठ्या संख्येने उपस्थित असलेल्या संगीतप्रेमी आणि रसिकांनी टाळ्यांच्या कडकडाटात त्यांच्या गायकीला उत्स्फूर्त दाद दिली.
डॉ. श्रीकांत शिंदे फाउंडेशन आणि श्री नवदुर्गा युवा मंडळ यांच्या वतीने आयोजित शारदीय नवरात्रोत्सवाची सुरुवात यंदा भक्ती आणि संगीताच्या अनोख्या संगमाने झाली.

सकाळी बळीराजाच्या सुख-समृद्धीसाठी नवकुंडात्मक सहस्रचंडी महायाग आणि विविध धार्मिक विधी पार पडल्यानंतर सायंकाळी राहुल देशपांडे यांच्या संगीत मैफलीने उत्सवाच्या सांस्कृतिक पर्वाला सुरुवात झाली. शास्त्रीय संगीताची समृद्ध परंपरा, नाट्यसंगीतातील भावस्पर्शी अभिव्यक्ती आणि सुरांची विलक्षण जाण यांचा प्रत्यय देणाऱ्या त्यांच्या गायनाने उपस्थित रसिकांना स्वरानंदाची अविस्मरणीय अनुभूती दिली.

राहुल देशपांडे हे शास्त्रीय संगीत आणि नाट्यसंगीताच्या क्षेत्रातील लोकप्रिय नाव असून, त्यांच्या गायकीतून सादर होणारी प्रत्येक रचना रसिकांना स्वरांच्या एका वेगळ्याच विश्वात घेऊन जाते. आजच्या मैफलीतही त्यांच्या सादरीकरणातील सुरेलता, भावपूर्णता आणि गायनातील सहजता यांचा सुंदर आविष्कार अनुभवायला मिळाला. त्यांच्या गायकीचा आनंद घेण्यासाठी मोठ्या संख्येने उपस्थित राहिलेल्या रसिकांनी प्रत्येक सादरीकरणाला भरभरून दाद दिली. संगीताच्या सुरांनी भारलेल्या या वातावरणात डोंबिवलीकरांनी या मैफलीचा मनमुराद आनंद लुटला.

यंदाच्या शारदीय नवरात्रोत्सवात सामाजिक बांधिलकी जपत बळीराजाच्या सुख-समृद्धीसाठी धार्मिक विधींचे आयोजन करण्यात आले आहे. राज्यावरील दुष्काळाचे संकट दूर व्हावे, शेतीला नवसंजीवनी लाभावी आणि महाराष्ट्र सुजलाम्-सुफलाम् व्हावा, या मंगल संकल्पनेतून सहस्रचंडी महायागाचे आयोजन करण्यात आले होते. त्याचबरोबर नागरिकांना दर्जेदार सांस्कृतिक कार्यक्रमांची पर्वणी मिळावी, या उद्देशाने राहुल देशपांडे यांच्या संगीत मैफलीचे आयोजन करण्यात आले होते. भक्ती, संस्कृती आणि संगीत यांचा सुरेख संगम साधणाऱ्या या उपक्रमाला नागरिकांचा मिळालेला उत्स्फूर्त प्रतिसाद उत्सवाची लोकप्रियता अधोरेखित करणारा ठरला.