नेशन न्यूज मराठी टीम.
शिर्डी/प्रतिनिधी – नाशिक विभागीय आयुक्तालयातील उपायुक्त रमेश काळे यांनी आज राहाता तहसील कार्यालयाला भेट दिली. पदवीधर मतदार संघाच्या पदवीधर मतदार नोंदणी कार्यक्रमाचा त्यांनी यावेळी आढावा घेतला. यावेळी राहाता तहसीलदार कुंदन हिरे, मंडळाधिकारी डॉ.मोहसीन शेख व तालुक्यातील इतर सहा पदनिर्देशीत अधिकारी उपस्थित होते. यावेळी काळे यांनी पदवीधर मतदार नोंदणी कार्यक्रमाबरोबर डाटा एन्ट्री कामकाजाचा आढावा ही घेतला.
भारत निवडणूक आयोगाचे निर्देशानुसार १ नोव्हेंबर २०२२ च्या अर्हता दिनांकावर आधारित नाशिक विभाग पदवीधर मतदार संघाच्या मतदार याद्या नव्याने तयार करण्याचा कार्यक्रम अहमदनगर जिल्ह्यात राबविण्यात येत आहे. यासाठी पदवीधरांना मतदार म्हणून नाव नोंदणी करण्यासाठी ७ नोव्हेंबर ही शेवटची मुदत आहे. नाशिक विभाग पदवीधर मतदार संघात ‘मतदार’ म्हणून नाव नोंदणी करण्यासाठी आता ऑनलाईन सुविधा ही उपलब्ध करून देण्यात आली आहे. मुख्य निवडणुक अधिकारी कार्यालयाच्या अधिकृत लिंकद्वारेच पदवीधर उमेदवार अर्ज करू शकतात. पदवीधर मतदार नाव नोंदणी ही ऑनलाईन आणि ऑफलाईन पद्धतीने नमूना-१८ भरून मंडळस्तरावर अथवा तहसील कार्यालयात (निवडणूक शाखा) येथे जमा करू शकतात अथवा मुख्य निवडणूक अधिकारी (महाराष्ट्र राज्य, मुंबई) यांच्या अधिकृत लिंकद्वारे
https://ceoelection.maharashtra.gov.in/graduate अर्ज दाखल करू शकतात. खाजगी संस्था, व्यक्ती अथवा राजकीय पक्ष वा कार्यकर्ते यांचेकडून गुगल अथवा इतर लिंकस् द्वारे मतदारांनी आपला नमूना-१८ भरल्यास असा अर्ज हा अधिकृत नाही. त्यामुळे उपरोक्त शासकीय लिंक वगळता इतर लिंकस् द्वारे भरलेला ऑनलाईन अर्ज ग्राह्य धरला जाणार नाही. अशा नमूना-१८ ची तहसील स्तरावर डाटा एन्ट्री केली जात नाही. पदवीधर मतदारांनी निवडणूक आयोगाच्या अधिकृत लिंकद्वारेच नमूना-१८ भरावा. असे आवाहन ही यावेळी उपायुक्त रमेश काळे यांनी केले.
