DESK MARATHI NEWS NETWORK.
डोंबिवली/संघर्ष गांगुर्डे – जपानच्या कावासाकी शहरात जागतिक जम्प रोप ( दोरी उड्या ) चॅम्पियन स्पर्धेत डोंबिवलीच्या तरुण मुलामुलींनी पुन्हा एकदा चमकदार कामगिरी करून दाखविली आहे. 27 जुलै ते 3 ऑगस्ट 2025 या दरम्यान झालेल्या स्पर्धेत महाराष्ट्राच्या टीमने दोन सुवर्ण आठ रौप्य आणि सहा कांस्य अशी एकूण 16 पदकांची कमाई केली असून त्यात बहुतेक खेळाडू हे डोंबिवलीकर होते हे विशेष. या जागतिक चॅम्पियन स्पर्धेत 36 देशातील 2600 खेळाडूंनी भाग घेतला होता. विशेष म्हणजे याच खेळाडूंनी जुलै 2023 मध्ये अमेरिकेत झालेल्या जागतिक जम्प रोप चॅम्पियन स्पर्धेत आणि जुलै 2024 जपान मध्ये एशियन स्पर्धेत अशीच पदके मिळवली होती. कोणताही सरकारी निधी, खाजगी प्रायोजक न घेता, स्वताच्या खर्चाने या टीमने ही कौतुकास्पद कामगिरी केली आहे. त्यामुळे पुढे अशीच कामगिरी करण्यासाठी त्यांना आर्थिक मदतीची गरज आहे. लोकप्रतिनिधी, सरकारी निधी व खाजगी प्रायोजक यांच्याकडून काही निधी मिळाल्यास या खेळासाठी अनेक नामवंत खेळाडू देशासाठी तयार होतील अशी अपेक्षा प्रशिक्षक नमन वर्मा यांनी व्यक्त केली आहे.
भूमिका नेमाडे एक सुवर्ण, एशान पुथ्रन एक सुवर्ण व एक रौप्य, तन्वी नेमाडे दोन रौप्य व एक कांस्य, नमन गंगवाल (नाशिक) दोन रौप्य व एक कांस्य, अमन वर्मा एक रौप्य व एक कांस्य, मानस मुंगी एक रौप्य व एक कांस्य, रोनक साळवे एक रौप्य, पारोल झंकार एक कांस्य, पद्माकर मोकाशी एक कांस्य अशी एकूण 16 पदके जिंकली आहेत. वय 16-18 आणि 19 + अशा वर्गवारीत एकेरी, दुहेरी, तिहेरी, मिश्र यामध्ये उपरोक्त पदके या तरुणांनी जिंकली आहेत. या टिमचे प्रशिक्षक अमन वर्मा यांनी गेले काही वर्षे डोंबिवलीतील विद्यार्थ्यांंना शाळा व कॉलेज मध्ये जावुन याचे खास प्रशिक्षण देत आहेत व यासाठी अथक परिश्रम त्यांनी घेतले आहेत.या विजयी टीमचे आज सोमवारी/मंगळवारी मध्यरात्री मुंबईच्या छत्रपती शिवाजी महाराज आंतरराष्ट्रीय विमानतळावर आगमन होत असून त्यांच्या स्वागतासाठी अनेकजण उपस्थित राहणार आहेत
