नेशन न्यूज मराठी ऑनलाईन टीम.
कल्याण/प्रतिनिधी – गरीब घरातील तरूणींना झटपट पैसे कमविण्याचे आमिष दाखवून तसेच त्यांचा विश्वास जिंकून अशा मुलींना देहव्यापारात ढकलले जाते. देहव्यापारासारखी गोष्ट समाजासाठी एक श्राप आहे. ज्यात व्यक्तीचे स्वातंत्र्य हिरावून घेऊन त्याचा एखाद्या वस्तूप्रमाणे वापर केला जातो. बांग्लादेशातील अशाच एका लाचार मुलीला नोकरीचे आमिष दाखवून कल्याणात आणले गेले.
डोंबिवली पूर्व येथील पलावा परिसरात राहणारा सतीश रजत याचा चार महिन्याचा मुलगा अचानक घरामधून गायब झाला. या संदर्भात मुलाचे वडील सतीश रजत यांनी डोंबिवलीतील मानपाडा पोलीस ठाण्यात तक्रार दिली. कल्याणचे डीसीपी सचिन गुंजाळ ,एसीपी सुनील कुऱ्हाडे, यांच्या मार्गदर्शनाखाली मानपाडा पोलीस स्टेशनचे वरिष्ठ पोलीस निरीक्षक विजय कादभाने यांच्या नेतृत्वात मुलाचा शोध सुरू झाला. पोलिसांना माहिती मिळाली की सतीशच्या घरात काम करणारी मोलकरीण यांनी चार महिन्याच्या मुलाचे अपहरण केले आहे. मानपाडा पोलिसांनी सदर मोलकरणीला शोधून काढले. ती अल्पवयीन होती, तिला ताब्यात घेत चार महिन्याच्या मुलाला त्याच्या आईच्या ताब्यात देण्यात आले. पोलिसांनी पुढील तपास सुरू केला मात्र जेव्हा पोलिसांनी अल्पवयीन मुलीची विचारपूस केली असता, तिने जे सांगितले ते ऐकून पोलीस देखील हैराण झाले.
दोन महिन्यापूर्वी गारमेंट मध्ये काम लावून देण्याच्या नावाखाली अल्पवयीन मुलगी ,तिची आई आणि मावशीला बांग्लादेशातून डोंबिवलीला आणले आणि अल्पवयीन मुलीला वेश्याव्यवसाय करायला भाग पाडले. एवढेच नाही तर,आरोपी पीडित मुलीला, तिच्या आई आणि मावशीला भेटू देत नव्हते. या गोष्टीचा राग आल्यामुळे पीडित मुलीने आरोपीच्या चार महिन्याच्या मुलाचे अपहरण केले.
अल्पवयीन मुलगी ही मुळची बांग्लादेशी आहे. अपहरण झालेल्या चार महिन्याच्या मुलाचे वडील सतीश रजक यांनी दोन महिन्यापूर्वी अल्पवयीन मुलीच्या आईला आणि मावशीला हे सांगून डोंबिवलीत आणले की, तो तिला एका गारमेंट कंपनीमध्ये कामाला लावणार आहे. पण सतीश यांनी असे न करता अल्पवयीन मुलीला देह व्यापार करायला भाग पाडले. दोन महिन्यांपासून ही मुलगी देह व्यवसायाचे काम करीत होती. एवढेच नाही तर,सतीश तिच्याकडून घरकाम देखील करून घेत होता. मुलीला तिच्या आई आणि मावशी यांना भेटू देत नव्हता. याचा राग काढण्यासाठी पीडितेने सतीशच्या चार महिन्याच्या मुलाचे अपहरण केले होते.
पीडित मुलीला बांगला सोडून कोणतीही भाषा येत नाही. या प्रकरणात मानपाडा पोलिसांनी सतीश रजत आणि त्याचा चुलत भाऊ सचिन रजत या दोघांना बेड्या ठोकल्या आहेत. पीडित मुलीला उल्हासनगर येथील बाल सुधारगृहात पाठवण्यात आले आहे. पुढील तपास सुरू आहे अशी माहिती मानपाडा पोलीस स्टेशनचे पोलीस निरीक्षक राम चोपडे यांनी दिली आहे.
