DESK MARATHI NEWS NETWORK.
कल्याण प्रातिनिधी – कल्याण डोंबिवली महानगरपालिकेच्या शास्त्रीनगर रुग्णालयातील अल्पवयीन मुलीच्या गर्भधारणा चाचणीच्या कथित चुकीच्या अहवालामुळे रुग्णालय पुन्हा एकदा वादाच्या भोवऱ्यात सापडले आहे. या प्रकरणाची गंभीर दखल घेत संबंधित डॉक्टर आणि जबाबदार अधिकाऱ्यांवर कारवाई करण्याची मागणी आमदार राजेश मोरे यांनी केली आहे.
३० जून रोजी मोठ्या प्रमाणात रक्तस्राव होत असल्याने १७ वर्षीय मुलीला उपचारासाठी शास्त्रीनगर रुग्णालयात आणण्यात आले होते. रुग्णालयात तिच्या गर्भधारणेची चाचणी करण्यात आली. या चाचणीचा अहवाल पॉझिटिव्ह आल्याचे सांगण्यात आले. त्यानंतर पुन्हा चाचण्या तसेच सोनोग्राफी करण्यात आल्याची माहिती समोर आली.
मात्र, रुग्णालयातील अहवालानंतर बाहेरील ठिकाणी करण्यात आलेल्या चाचणीचा अहवाल निगेटिव्ह आल्याने या संपूर्ण प्रकरणावर प्रश्नचिन्ह निर्माण झाले आहे. त्यामुळे रुग्णालयातील चाचणी प्रक्रिया, अहवालाची अचूकता आणि संबंधित वैद्यकीय कर्मचाऱ्यांच्या कार्यपद्धतीबाबत चौकशीची मागणी जोर धरू लागली आहे.
या प्रकरणाची गांभीर्याने चौकशी करून दोषी आढळणाऱ्या संबंधित डॉक्टरांवर आणि जबाबदार कर्मचाऱ्यांवर कठोर कारवाई करण्यात यावी, अशी मागणी आमदार राजेश मोरे यांनी केली आहे. दरम्यान, या प्रकरणाची चौकशी करण्यासाठी केडीएमसी प्रशासनाकडून समिती गठीत करण्यात आली असून चौकशीत नेमके काय समोर येते, याकडे आता सर्वांचे लक्ष लागले आहे.
