DESK MARATHI NEWS NETWORK.
डोंबिवली/प्रतिनिधी – डोंबिवली शास्त्रीनगर रुग्णालयात उपचारासाठी दाखल झालेल्या १७ वर्षीय अल्पवयीन मुलीच्या प्रेग्नन्सी टेस्टचे अहवाल पॉझिटिव्ह आल्याच्या प्रकाराने खळबळ उडाली आहे. या प्रकरणाची गंभीर दखल घेत कल्याण-डोंबिवली महानगरपालिका प्रशासन ॲक्शन मोडमध्ये आले असून, या संपूर्ण प्रकरणाच्या चौकशीसाठी समिती गठीत करण्यात आली आहे.
३० जून रोजी मोठ्या प्रमाणात रक्तस्राव होत असल्याने संबंधित मुलीला शास्त्रीनगर रुग्णालयात उपचारासाठी दाखल करण्यात आले होते. यावेळी रुग्णालयात करण्यात आलेल्या यूपीटी युरीन प्रेग्नन्सी टेस्ट तिन्ही वेळा पॉझिटिव्ह आल्याची माहिती केडीएमसी प्रशासनाकडून देण्यात आली आहे.
मात्र, मुलीच्या पालकांनी खासगी रुग्णालयात पुन्हा तपासणी केली असता तेथील अहवाल निगेटिव्ह आल्याचा दावा केला होता. त्यामुळे शास्त्रीनगर रुग्णालयातील तपासणी प्रक्रियेवर आणि अहवालांच्या अचूकतेवर प्रश्नचिन्ह उपस्थित झाले आहे.
या प्रकाराची चौकशी करण्यासाठी केडीएमसी प्रशासनाने समिती गठीत केली असून, रुग्णालयातील तपासणी प्रक्रिया, संबंधित वैद्यकीय नोंदी आणि अहवाल यांची तपासणी केली जाणार आहे. चौकशीत कोणाची चूक अथवा निष्काळजीपणा आढळल्यास संबंधितांवर नियमानुसार कायदेशीर कारवाई केली जाईल, असा इशारा केडीएमसीच्या मुख्य वैद्यकीय अधिकारी डॉ. दीपा शुक्ल यांनी दिला आहे.
