नेशन न्यूज मराठी टीम.
धुळे / प्रतिनिधी – अनंत चतुर्दशी आणि ईद-ए- मिलाद हे उत्सव एकाच दिवशी येत आहेत. या पार्श्वभूमीवर ईद-ए- मिलादची मिरवणूक जिल्ह्यातील ग्रामीण भागातील इतर ठिकाणी २९ सप्टेंबर तर धुळे शहरात ३० सप्टेंबर रोजी काढण्याचा निर्णय घेण्यात आला. मुस्लीम बांधवांनी सामाजिक एकात्मता जोपासण्याचा संदेश दिला आहे, अशी माहिती जिल्हाधिकारी अभिनव गोयल यांनी बैठकीतून दिली.
गणेशोत्सवाच्या पार्श्वभूमीवर ईद- ए-मिलादच्या मिरवणुकीच्या संदर्भात आढावा बैठक जिल्हा नियोजन सभागृह येथे घेण्यात आली. या बैठकीस जिल्हाधिकारी अभिनव गोयल, पोलिस अधीक्षक संजय बारकुंड, आयुक्त अमिता दगडे- पाटील, अपर जिल्हाधिकारी देवदत्त केकाण, अपर पोलिस अधीक्षक किशोर काळे, निवासी उपजिल्हाधिकारी नितीन गावंडे यांच्यासह विविध विभागांचे अधिकारी उपस्थित होते.
यावर्षी गुरुवार, २८ सप्टेंबर २०२३ अनंत चतुर्दशी आणि ईद-ए- मिलाद हे सण एकाच दिवशी येत असल्याने कायदा व सुव्यवस्था अबाधित राहण्यासाठी अनंत चतुर्दशीच्या दिवशी ऐवजी ईद-ए- मिलादची मिरवणूक एक किंवा दोन दिवसांनी काढण्याच्या सूचना जिल्हा प्रशासनाच्या वतीने सिरत कमिटी सदस्य तसेच बैठकीस उपस्थित मुस्लीम बांधवांना करण्यात आली.
याबाबत उपस्थित मुस्लीम बांधवांनी धुळे जिल्हा प्रशासनाशी चर्चा करून चर्चेअंती धुळे शहरातील ईद-ए-मिलादची मिरवणूक शनिवारी, ३० सप्टेंबर २०१३ रोजी काढण्यात येईल व त्याव्यतिरिक्त जिल्ह्यातील इतर ठिकाणी निघणाऱ्या मिरवणुका शुक्रवार, २९ सप्टेंबर २०२३ रोजी काढण्याचा निर्णय सर्वानुमते घेण्यात आला. या निर्णयाचे कौतुक जिल्हा पोलीस अधीक्षक संजय बारकुंड यांनी यावेळी केले.
