DESK MARATHI NEWS NETWORK.
कल्याण/प्रतिनिधी – देशभरात चोरी, लूटमार आणि अमली पदार्थांच्या तस्करीसाठी कुख्यात मानल्या जाणाऱ्या कल्याणमधील इराणी वस्तीत पोलिसांनी मोठे कोंबिंग ऑपरेशन राबवले. डीसीपी अतुल झेंडे आणि एसीपी अशोक होनमाने यांच्या नेतृत्वाखाली झालेल्या या कारवाईत शंभरहून अधिक पोलीस अधिकारी आणि कर्मचारी सहभागी झाले होते.
या धडक कारवाईदरम्यान पोलिसांनी तीन सराईत आरोपींना ताब्यात घेतले. यामध्ये दोन वॉण्टेड महिला आरोपींचा समावेश आहे. समा इराणी ही आंबिवली रेल्वे स्थानकात पोलिसांवर हल्ला केल्याप्रकरणी अनेक वर्षांपासून पोलिसांना हवी असलेली आरोपी होती. तर दुसरी महिला आरोपी मानपाडा पोलीस ठाण्याच्या हद्दीतील एका गुन्ह्यात फरार असल्याची माहिती पोलिसांनी दिली.
कोंबिंग ऑपरेशनदरम्यान पोलिसांनी आणखी दोन व्यक्तींनाही चौकशीसाठी ताब्यात घेतले होते. मात्र, त्यांचा कोणत्याही गुन्ह्यात सहभाग आढळून न आल्याने चौकशीनंतर त्यांना सोडून देण्यात आले.
मोहम्मद गुलाम हुसेन इराणी याच्याबाबत पोलिसांना महत्त्वाची माहिती मिळाली आहे. पोलिसांच्या माहितीनुसार, तो दिवसा चोरी करत असल्याचा आणि रात्री एमडी ड्रग्सची विक्री करत असल्याचा आरोप आहे. त्याच्याकडून पोलिसांनी सुमारे आठ लाख रुपये किमतीचा एमडी अमली पदार्थ जप्त केल्याची माहिती समोर आली आहे.
या कारवाईमुळे इराणी वस्तीत सुरू असलेल्या कथित गुन्हेगारी कारवायांना मोठा धक्का बसला आहे. गुन्हेगारीवर नियंत्रण मिळवण्यासाठी कल्याण पोलिसांनी राबवलेल्या या धडक कोंबिंग ऑपरेशनमुळे परिसरात पोलिसांचा वचक निर्माण झाला आहे.
