सांगली/प्रतिनिधी – उन्हाळी सुट्ट्या असल्या कारणाने अनेकजण फिरायला बाहेर पडत आहे. मोठ्या प्रवासादरम्यान मौल्यवान वस्तू, दागिने न घालण्याचा सल्ला दिला जातो. पण काहीजण एवढे बिंधास्त असतात कि त्यांचे याकडे दुर्लक्ष्य होते. अशाच लोकांच्या शोधात चोरटे असतात. सांगलीतील कळंबीतून दरोड्याचा धक्कादायक प्रकार समोर आल्याने खळबळ उडाली आहे. पेट्रोल पंपाजवळ थांबलेल्या हैदराबाद येथील प्रवासी वाहनावर दरोडा टाकण्यात आला. या दरोड्यात प्रवाशांचे 4 तोळे सोन्याचे दागिने चोरून दरोडेखोरांनी लंपास केले.
हैदराबाद मधील चंद्रकांत बावीकाडी हे कुटुंबासमवेत महाराष्ट्रात देवदर्शनासाठी आले होते. सोलापूर जिल्ह्यातील तुळजाभवानी आणि पंढरपूर येथील विठ्ठलाचे दर्शन घेतल्यानंतर ते कोल्हापूर येथे अंबाबाईच्या दर्शनासाठी निघाले होते. परंतु मध्यरात्री एक वाजण्याच्या सुमारास ते सांगली जिल्ह्यातील कळंबी या गावात पोहोचले. त्यांनी कळंबी गावाजवळ असलेल्या एका पेट्रोल पंपाचा आसरा घेऊन बावीकाडी कुटुंब गाडीमध्येच झोपी गेले. थोड्या वेळानंतर आठ ते दहा जणांच्या दरोडेखोरांच्या टोळीने बावीकाडी यांच्या कुटुंबाला गाठले. सर्वांना चाकूचा धाक दाखवून दरोडेखोरांनी महिलांच्या गळ्यातील 4 तोळे सोन्याचे दागिने चोरून नेले. तसेच पंधरा हजार रुपयांची रोकड काढून घेतली. दरोडेखोरांना विरोध करताना चंद्रकांत बावीकाडी आणि त्यांच्या पत्नीवर दरोडेखोरांच्या टोळीने चाकू हल्ला केला. दरोडेखोरांच्या शोधासाठी सांगली स्थानिक गुन्हे शाखा आणि मिरज ग्रामीण पोलिसांची पथके रवाना करण्यात आल्याची माहिती पोलीस उप अधीक्षक प्रणील गिल्डा यांनी दिली आहे.
