नेशन न्युज मराठी टीम.
डोंबिवली – कोरोनाच्या दुसऱ्या लाटेनंतर आता देशात सर्वत्र कोरोनाची तिसरी लाट आल्याचे दिसत असून समूह संसर्गाने संक्रमित होणारी दैनंदिन रुग्णसंख्या खुप मोठ्या प्रमाणावर सध्या वाढत आहे. या पार्श्वभूमीवर कल्याण -डोंबिवली महानगरपालिकेची आरोग्य यंत्रणा पूर्णपणे सज्ज असून या दृष्टिने अधिक सक्षम होत कल्याण डोंबिवली परिसरातील नागरिकांकरिता जास्तीत जास्त खाटां उपलब्ध करण्याचा प्रयत्न प्रशासनाकडून सुरु आहे. याच पार्श्वभूमीवर कल्याण डोंबिवली महानगरपालिके तर्फे डोंबिवली एमआयडीसी येथे ५०० खाटांचे डेडिकेटेड कोविड रुग्णालय उभारण्याचे काम सुरु असून या कोविड रुग्णालयाच्या कामाची पाहणी करत तेथील आरोग्य यंत्रणा आणि व्यवस्थापनाचा आढावा शिवसेना खासदार श्रीकांत शिंदे व भाजप आमदार रवींद्र चव्हाण यांनी घेतला घेतला.
रुग्णालयामधील २५० खाटांच्या आयसीयु विभागात २०० आयसीयु खाटां आणि ५० नवजात शिशु अतिदक्षता विभाग (NICU) व बालरोग अतिदक्षता विभाग (PICU) असणार असून उर्वरित सर्व ऑक्सिजन खाटां असणार आहेत. डोंबिवली परिसरातील कोरोना संक्रमित रुग्णांना स्थानिक पातळीवर खाटा उपलब्ध होत त्यांच्यावर वेळेत उपचार व्हावेत याकरिता आतापर्यंत कल्याण डोंबिवली मनपा प्रशासनाने कोरोनाच्या पहिल्या आणि दुसऱ्या लाटेदरम्यान मनपा परिक्षेत्रात अनेक ठिकाणी डेडिकेटेड कोविड रुग्णालये, कोविड सेंटर्सच्या माध्यमातून ९००० खाटां उपलब्ध केल्या आहेत. या कोविड रुग्णालयाचे काम आता अंतिम टप्प्यात आले असून लवकरच हे रुग्णालय नागरिकांच्या सेवेकरिता उपलब्ध होणार आहे. अद्ययावत आरोग्य यंत्रणा, सर्व सुविधांनी सुसज्ज आणि येथील तज्ञ डॉक्टरांच्या मदतीने रुग्णांवर येथे तातडीने आणि योग्यप्रकारे उपचार होतील.या वेळी केडीएमसी आयुक्त तसेच पालिकेचे इतर अधिकारी व मान्यवर उपस्थित होते.
