नेशन न्युज मराठी टीम.
कल्याण – कल्याण डोंबिवली महापालिकेत वर्षोनूवर्षे एकाच पदावर कार्यरत असलेल्या अधिकारी व कर्मचा-यांच्या पदोन्नती निवड यादीस आयुक्त डॉ. विजय सूर्यवंशी यांनी आज मंजूरी दिल्याने अधिकारी व कर्मचा-यांमध्ये आनंदाचे वातावरण पसरले आहे.
क.डों.म.पा.चा सुधारीत आकृतीबंध व सेवा प्रवेश नियम, 2021 ला नगरविकास विभागाने 1 जून 2021 रोजी मंजूरी दिल्यानंतर मंजूर पदसंख्येनुसार व सेवा प्रवेश नियमानुसार अधिकारी व कर्मचा-यांचे पदोन्नतीचे प्रश्न तातडीने मार्गी लावण्याबाबत आयुक्त डॉ. सूर्यवंशी यांनी अतिरिक्त आयुक्त सुनिल पवार, सामान्य प्रशासन विभागाचे उप आयुक्त बाळासाहेब चव्हाण यांना निर्देश दिले होते. त्यानुसार आयुक्त अध्यक्ष असलेल्या विभागीय पदोन्नती समितीमधील अतिरिक्त आयुक्त्, उप आयुक्त ( सा.प्र ),मुख्य लेखा परिक्षक, मुख्य लेखा व वित्त अधिकारी, अध्यक्ष-मागासवर्गीय कक्ष यांच्या समितीने 288 अधिकारी व कर्मचा-यांच्या पदोन्नतीचे विषय मार्गी लावले आहेत.
या मध्ये कार्यकारी अभियंता विद्युत श्री. प्रशांत भागवत ,मुख्य वैद्यकीय अधिकारी म्हणून डॉ. दिपा श्री. शुकला, डॉ. प्रज्ञा टिके (सावंत), डॉ. पुरुषोत्तम टिके, डॉ. योगेश चौधरी, डॉ. हेमराज देवरे यांचा समावेश आहे. माहिती व जनसंपर्क अधिकारी-1,लघुलेखक उच्चश्रेणी-4,लेखाधिकारी-2, मेट्रन -2, मुख्य स्वच्छता अधिकारी-1, उप मुख्य स्वच्छता अधिकारी-1, शिक्षणाधिकारी-1, क्रीडा अधिकारी-1, सुरक्षा अधिकारी-1, सिनियर प्लंबर-1, आरेखक-1, आरेखक कम अनुरेखक-1, सिस्टर इनचार्ज-42, स्टाफ नर्स-32, स्वच्छता अधिकारी-7, अग्निशमन व उप अग्निशमन अधिकारी-17, लिडींग फायरमन-30, चालक यंत्र चालक-4, मुख्याध्यापक-13 तर वर्ग चार वरील पदांवर नाईक शिपाई-6, वरीष्ठ सुरक्षा रक्षक-4, थिएटर अटेंडन्ट 14 तसेच 41 सफाई कर्मचा-यांना “ मुकादम” या पदासह विविध संवर्गातील एकूण 288 अधिकारी व कर्मचा-यांना पदोन्नती देण्यात आलेली आहे.
यामध्ये प्रामुख्याने 9 दिव्यांग कर्मचा-यांचा देखील समावेश आहे.तसेच उर्वरीत संवर्गाच्या पदोन्नतीबाबतची छाननी प्रक्रीया सुरु असुन त्यावर देखील तातडीने निर्णय घेण्याबाबतचे आदेश आयुक्तांनी दिले आहेत.
आयुक्तांच्या या निर्णयाने सन 2012 नंतर प्रथमच इतक्या मोठया संख्येने पदोन्नती देण्याचा निर्णय आयुक्त डॉ सूर्यंवशी यांच्या अध्यक्षतेखालील विभागीय पदोन्नती समितीने घेतला आहे.
