नेशन न्यूज मराठी ऑनलाइन टीम.
कोल्हापूर/प्रतिनिधी – शाहू महाराजांचा वारसा लाभलेल्या कोल्हापुरातील राजकारणाला वेगळेच वळण लागले आहे. कोल्हापूरच्या मातीतला रांगडेपणा आता राजकारणात उतरला आहे. महाराष्ट्रातील महत्त्वाच्या लोकसभा निवडणुकीपैकी एक असेलल्या कोल्हापूरच्या निवडणुकीकडे सर्वांचे लक्ष्य लागून आहे. कोल्हापूर लोकसभा मतदारसंघात 7 मे रोजी निवडणुकीच्या तिसऱ्या टप्प्यात मतदान होणार आहे. कोल्हापूमध्ये शाहू महाराज आणि खासदार संजय मंडलिक हे निवडणुकीच्या रिंगणात आहेत.
मंडलिक यांनी आपल्या प्रचारसभेत थेट शाहू महाराज यांच्यावर टीका केली होती. मंडलिक यांच्या टीकेला सतेज पाटील यांनी उत्तर दिलं आहे. “संजय मंडलिक शाहू महाराजांवर बोलायला लागले, प्राध्यापकांनी असे वागू नये असे म्हणतात, मात्र ते वागत आहेत. शेवटी मला सुद्धा माझी हलगी वाजवावी लागेल अजून चौदा दिवस आहेत. बंटी पाटील गप्प बसणार नाही. तुम्ही बंटी पाटलांवर टीका करा हा पाटील तुम्हाला उत्तर द्यायला तयार आहे. मात्र, शाहू महाराज आमची अस्मिता आहे. त्यांना चॅलेंज केलं आहे. विकासाच्या कामावर गप्पा मारायला समोर यावं. कशाला त्यांना तुम्ही विनंती करता मी यायला तयार आहे. पाच वर्षात तुम्ही काय केल आणि पाच वर्षात कोल्हापूरचं काय नुकसान झालं? हे सांगायला मी तयार आहे.” अशी जहरी टीका सतेज पाटील यांनी आपल्या विरोधकावर केली आहे. कोल्हापूर लोकसभा मतदारसंघाच्या निवडणूकीतील महाविकास आघाडीचे उमेदवार शाहू छत्रपती यांच्या प्रचारार्थ जिल्हा बँकेचे माजी अध्यक्ष अप्पी पाटील यांनी आयोजित केलेल्या मेळाव्यात आमदार सतेज पाटील बोलत होते.
