नेशन न्यूज मराठी टीम.
रत्नागिरी/प्रतिनिधी – ‘सिल्व्हर पापलेट’ मासा हा महाराष्ट्राचा ‘राज्यमासा’ म्हणून घोषित करण्यात आला आहे. सिल्व्हर पापलेटला यापुढे महाराष्ट्राचा राज्यमासा म्हणून ओळखले जावे अशी घोषणा राज्याचे वन, सांस्कृतिक आणि मत्स्यव्यवसाय मंत्री सुधीर मुनगंटीवार यांनी राष्ट्रीय परिषदेत केली. मुंबईतील मस्त्यपालन, पशुपालन तथा डेयरी क्षेत्रातील किसान क्रेडिट कार्ड या विषयासंदर्भातील राष्ट्रीय परिषदेत त्यांनी ही घोषणा केली.
ऑगस्ट महिन्याच्या मध्यावर मच्छीमारांनी सिल्व्हर पापलेट हा मासा राज्यमासा म्हणून घोषित केला जावा अशी मागणी केली होती, जेणेकरुन त्याचे महत्त्व लक्षात घेऊन संवर्धनाच्या कामात हातभार लागेल. या घोषणेमुळे कोळी बांधव आणि मत्स्य व्यावसायिकांमध्ये आनंदाचे वातावरण आहे. ‘सिल्व्हर पापलेट’ या माशामध्ये मोठ्या प्रमाणात प्रथिने असतात. प्रामुख्याने पश्चिम किनाऱ्यालगत महाराष्ट्र आणि गुजरातच्या किनारपट्टीवर आढळणाऱ्या या माशांच्या व्यवसायातून अनेक मच्छीमारांचा उदरनिर्वाह चालतो.
हा मासा उत्पन्नाचा मोठा स्त्रोत असल्यामुळे अनेक कोळीबांधवांचे आर्थिक गणित त्यावर अवलंबून आहे. त्याचबरोबर, ‘सिल्व्हर पापलेटची’ मोठ्या प्रमाणावर निर्यात केली जाते, यातून देशाला मोठा आर्थिक फायदा होतो. लहान असलेली पिल्ले किंवा गाभोळी असलेल्या मादी पापलेट पकडल्यामुळे त्यांची नवीन पिढी निर्माण होत नाही. त्यामुळेच त्यांच्या संख्येत आता मोठी घट झाली आहे. यातून त्याचे संवर्धन व्हावे यासाठी हा निर्णय महत्त्वाचा ठरला आहे.
