नेशन न्यूज मराठी ऑनलाइन टिम.
ठाणे/प्रतिनिधी– राष्ट्रीय विधी सेवा प्राधिकरण, नवी दिल्ली तसेच महाराष्ट्र राज्य विधी सेवा प्राधिकरण, मुंबई यांचे निर्देशानुसार ठाणे आणि पालघर जिल्ह्यातील जिल्हा न्यायालय व सर्व तालुका न्यायालये तसेच कौटुंबिक न्यायालय, कामगार न्यायालय, सहकार न्यायालय, जिल्हा ग्राहक तक्रार निवारण आयोग, शाळा न्यायाधीकरण, ऋण वसुली न्यायाधीकरण व इतर न्यायालयांमध्ये शनिवार, दि. 09 डिसेंबर, 2023 रोजी सकाळी 10.30 वाजता “राष्ट्रीय लोकअदालत” चे आयोजन करण्यात आले आहे. या संधीचा फायदा घ्यावा व जास्तीत जास्त प्रकरणे लोकअदालतमध्ये ठेवण्यासाठी ज्या न्यायालयात प्रलंबित असतील त्या न्यायालयात अर्ज करावा. तसेच दाखल पूर्व प्रकरणाबाबत जिल्हा विधी सेवा प्राधिकरण, ठाणे किंवा संबंधित तालुका विधी सेवा समिती यांच्याकडे अर्ज करावा, असे आवाहन जिल्हा विधी सेवा प्राधिकरणाचे सचिव न्या. ईश्वर सूर्यवंशी यांनी केले आहे.
जिल्हा न्यायाधीश- 1 व अति. सत्र न्यायाधीश तथा जिल्हा विधी सेवा प्राधिकरणाचे प्रभारी अध्यक्ष व प्रभारी प्रमुख जिल्हा व सत्र न्यायाधीश ए. एम. शेटे यांच्या मार्गदर्शनाखाली ही लोकअदालत होणार आहे. या राष्ट्रीय लोकअदालतमध्ये ठाणे आणि पालघर जिल्ह्यातील सर्व न्यायालयांमधील प्रलंबित प्रकरणे जी दिवाणी स्वरूपाची, तडजोडीस पात्र फौजदारी स्वरूपाची, वैवाहिक स्वरूपाची, 138 एन. आय अॅक्ट (चेक संबंधीची) अन्वये दाखल झालेली प्रकरणे, बँक वसूली प्रकरणे, मोटार अपघात नुकसान भरपाई प्रकरणे, कौटुंबिक वाद प्रकरणे, कामगार विषयक वाद, भूसंपादन प्रकरणे, वीज व पाणी विषयक देयक प्रकरणे, महसूली प्रकरणे तसेच दावा दाखल पूर्व प्रकरणे इत्यादी तडजोडीसाठी ठेवण्यात येणार आहेत.
यासंबंधी अधिक माहितीसाठी सचिव, जिल्हा विधी सेवा प्राधिकरण, न्याय सेवा सदन, पहिला मजला, जिल्हा न्यायालय परिसर, ठाणे येथे प्रत्यक्ष येवून किंवा फोन नंबर ०२२-२५४७६४४१, व्दारे संपर्क साधावा. सर्व पक्षकारांनी प्रलंबित प्रकरणे सामंजस्याने सोडविण्याकरिता व आपले दुरावलेले संबंध पुर्नस्थापीत करण्यासाठी राष्ट्रीय लोकअदालतीचा अवश्य लाभ घ्यावा, असे आवाहन जिल्हा विधी सेवा प्राधिकरणाचे प्रभारी अध्यक्ष तथा प्रभारी प्रमुख जिल्हा व सत्र न्यायाधीश श्री. ए. एम. शेटे व सचिव ईश्वर कां. सुर्यवंशी यांनी केले आहे.
