नेशन न्यूज मराठी ऑनलाइन टीम.
कल्याण/प्रतिनिधी – कल्याण-डोंबिवली महापालिका हद्दीत बेकायदा बांधकामे उभारण्याचे प्रमाण वाढत आहे. या बेकायदा बांधकामातील घरे नागरीकांना कमी किंमतीत विकून त्यांची फसवणूक केली जाते. केवळ नागरीकांचीच फसवणूक केली जात नाही तर महापालिका प्रशासन, राज्य सरकार आणि रेरा प्राधिकरणाचीही फसवणूक करण्यात येते आहे. यावर तोडगा काढण्यासाठी केडीएमसाकडून बांधकाम परवानगी प्राप्त असलेल्या भूखंडाच्या दर्शनी भागावर माहिती फलक लावण्याची सक्ती करण्यात आली आहे.
महापालिकेकडून विविध भूखंड विकसीत करण्यासाठी परवानगी दिली जाते. प्रचलित विकास नियंत्रण नियमावलीनुसार अशी बांधकाम परवानगी प्राप्त असलेल्या भूखंडाच्या दर्शनीभागावर माहिती फलक लावण्यास सक्ती करण्यात आली आहे. या माहिती फलकांमुळे नागरीकांना देखील बांधकाम अधिकृततेविषयी सहजरित्या खात्री करता येऊ शकते. येत्या तीन दिवसात माहिती फलक लावण्याची कार्यवाही करण्यात यावी असे आदेश महापालिका आयुक्त डॉ. इंदूराणी जाखड यांनी दिले आहेत.
जे विकासक तीन दिवसांच्या आत माहिती फलक लावणार नाहीत. ते बांधकाम अनधिकृत ग्राह्य धरुन प्रभाग अधिकारी कार्यालयाकडून दंड आकारला जाईल. तसेच संबंधित बांधकामाला स्थगिती देण्यात येईल असे आदेश महापालिकेच्या सहाय्यक संचालक नगररचनाकार दिशा सावंत यांना दिले आहेत. नागरीकांकडून बेकायदा बांधकामात घर खरेदी केल्याने त्यांची फसवणूक होत आहे त्याला आळा घालण्यासाठी आयुक्तांनी नवा तोडगा काढून माहिती फलक लावण्याची सक्ती केली आहे.
