नेशन न्यूज मराठी टीम.
कल्याण/संघर्ष गांगुर्डे – कल्याण स्टेशन परिसरात स्मार्ट सिटी प्रकल्पाअंतर्गत सुरू असणाऱ्या उड्डाणपुलाच्या कामामुळे कल्याण स्टेशन परिसरात नागरिकांना मोठ्या वाहतूक कोंडीला सामोरे जावे लागत आहे. म्हणून हि वाहतूक कोंडी फोडण्यासाठी केडीएमसीने व संबधित विभागाच्या पदाधिकारी यांच्यात बैठक घेउन विविध महत्वाचे निर्णय घेण्यात आले आहेत. उड्डाणपुल कामांचे काही टप्पे पूर्ण होईपर्यंत कल्याण स्टेशन परिसरातील बाहेरगावच्या एसटी, एनएनएमटी, केडीएमटी बसेस दुर्गाडी चौकातून सोडण्याचा महत्वपूर्ण निर्णय केडीएमसी प्रशासनाने घेतला आहे. त्याच बरोबर बाहेरगावहून येणाऱ्या एसटी बसेस आता कल्याण स्टेशनला जाणार नाहीत. त्याऐवजी या बसेस दुर्गाडी गणेश घाट आणि गुरुदेव हॉटेल परिसरामध्ये प्रवासी सोडण्याचे आणि घेण्याचे काम करतील. येत्या सोमवारपासून म्हणजेच 5 डिसेंबरपासून बाहेरगावच्या बसेस सुटण्याचे हे बदल लागू होणार असल्याची माहिती आयुक्त डॉ.भाऊसाहेब दांगडे यांनी दिली.
तर कल्याण एसटी डेपोमधून बाहेरगावी जाणाऱ्या एस टी बसेस या आता दुर्गाडी गणेश घाट येथून सोडण्यात येतील. यासाठी आवश्यक असणाऱ्या सुविधा दुर्गाडी आणि मुरबाड रोड गणेश घाट परिसरात उपलब्ध करून देण्यात येतील.केडीएमटीच्या पनवेल, वाशी जाणाऱ्या आणि एनएमएमटीच्या कल्याण स्टेशन परिसरात येणाऱ्या सर्व बसेसही आता दुर्गाडीहून सुटणार आहेत. कल्याण स्टेशन वरून दुर्गाडी चौकात किंवा गणेश घाट परिसरात जाण्यासाठी मिनी बसची व्यवस्था करण्यात आली आहे. या मिनी बस केडीएमटी, एनएमएमटी किंवा एसटीच्या असू शकतील अशी माहिती आयुक्त डॉ. भाऊ साहेब दांगडे यांनी दिली
हा बदल पुढील वर्षीच्या मार्च महिन्याच्या अखेरीपर्यंत सुटतील. डिसेंबर ते मार्च या चार महिन्यांपर्यंत हे बदल लागू राहणार असून तोपर्यंत स्टेशन परिसरातील उड्डाणपुलाचे काम बऱ्यापैकी झाले असेल. ज्यामुळे त्याच्या खालून पुन्हा एकदा पूर्वीसारखी वाहतूक सुरू करता येईल असेही असेही केडीएमसी आयुक्त यांनी सागितले
स्टेशन परिसरात रिक्षा चालकांची सर्वात मोठी गर्दी असते. रिक्षांच्या चार चार लाईनमुळेही स्टेशन परिसरात मोठी वाहतूक कोंडी होत असते. त्यामुळे कल्याण स्टेशन परिसरात आता रिक्षांच्या केवळ दोन लाईन्स असतील. एक मीटरवर जाणाऱ्या रिक्षांची तर दुसरी शेअरवर जाणाऱ्या रिक्षांची रांग असेल.तर स्टेशन परिसरात अनधिकृत काळ्या पिवळ्या टॅक्सीनाही प्रतिबंध घालण्यात येणार असून केवळ अधिकृत काळ्या पिवळ्या टॅक्सीनाच दुर्गाडी चौक परिसरात परवानगी असेल हा हि निर्णय या बैठकीत घेण्यात आल्याचे पालिका आयुक्त यांनी सागितले
तसेच येत्या 15 दिवसांत या चौकांतील रस्ते दुरुस्ती, झेब्रा क्रॉसिंग आणि इतर मार्किंग करून व्यवस्था करून दिली जाईल. त्यानंतर वाहतूक पोलीस विभागाकडून हे सर्व ट्रॅफिक सिग्नल्स सुरू होण्याच्या दृष्टिकोनातून कार्यवाही करतील असेही आयुक्त डॉ. दांगडे म्हणाले.दरम्यान केडीएमसी मुख्यालयात झालेल्या या बैठकीला केडीएमसी अधिकारी, वाहतूक पोलीस, एसटी अधिकारी, परिवहन अधिकारी, रिक्षा संघटनांचे प्रतिनिधी आदी पदाधिकारी उपस्थित होते.
