नेशन न्यूज मराठी टीम.
कल्याण/संघर्ष गांगुर्डे – कल्याण डोंबिवली महापालिका आयुक्त डॉ.भाऊसाहेब दांगडे यांच्या निर्देशानुसार व उपायुक्त सुधाकर जगताप यांच्या मार्गदर्शनाखाली ह प्रभागाचे सहा. आयुक्त सुहास गुप्ते यांनी डोंबिवली पश्चिम कोपर क्रॉस रोड, जैन मंदिर शेजारी बांधकामधारक नुरसिंग राठोड यांच्या तळ + ६ मजली अनधिकृत इमारतीच्या स्लॅब बांधकामावर निष्कासनाची धडक कारवाई काल दिवसभरात केली.
हि कारवाई अनधिकृत बांधकाम नियंत्रण विभागाचे अधिक्षक अरुण पाटील व इतर कर्मचारी, महापालिका पोलिस कर्मचारी, विष्णुनगर पोलिस स्टेशनचे कर्मचारी यांच्या मदतीने आणि ४ काँक्रीट ब्रेकर व २० मजूर यांच्या सहाय्याने करण्यात आली.
तसेच आय प्रभागातही सहा. आयुक्त हेमा मुंबरकर यांनी द्वारली येथील बांधकामधारक कमलेश दुबे यांच्या तळ + ४ मजली अनधिकृत इमारतीच्या बांधकामावर निष्कासनाची धडक कारवाई काल दिवसभरात केली. हि कारवाई अनधिकृत बांधकाम नियंत्रण विभाग व फेरीवाला हटाव पथक कर्मचारी, महापालिका पोलिस कर्मचारी यांच्या मदतीने आणि २ ब्रेकर, १ पोकलेन, १ जेसीबी व १० कामगार मजूर यांच्या सहाय्याने करण्यात आली.
