नेशन न्यूज मराठी ऑनलाइन टीम.
कल्याण/प्रतिनिधी – कल्याण कोळशेवाडी पोलिसांनी विठ्ठलवाडी परिसरातील गायकवाड चाळीत छापा टाकून तब्बल 7 लाखांचा गुटखा जप्त केला आहे. या गुटख्याचा साठा गायकवाड चाळीमधील एका खोलीत साठवून ठेवण्यात आला होता. त्याची विक्री करण्यात येणार होती. मात्र त्यापूर्वीच पोलिसांनी छापा टाकत हा गुटखा जप्त केला आहे.
या प्रकरणातील मुख्य सूत्रधार मनिष यादव याच्यासह इसरार अहमद, विनोद गंगवाणी सह त्याचे दोन साथीदार पसार झाले असून पोलीस त्यांचा शोध घेत आहेत. कल्याण पूर्वेकडील विठ्ठलवाडी परिसरातील मागील बाजूस असलेल्या गायकवाड चाळीतील एका खोलीमध्ये बेकायदेशीररित्या गुटख्याच्या साठा असून खरेदी विक्री सुरू असल्याची माहिती कल्याणचे डीसीपी सचिन गुंजाळ यांना मिळाली होती.
या माहितीच्या आधारे कल्याण कोळशेवाडी पोलीस ठाण्याचे वरिष्ठ पोलीस निरीक्षक राजेश शिरसाठ ,पोलीस अधिकारी उल्हास जाधव, दिनकर पगारे यांच्या पथकाने गायकवाड चाळीतील खोलीत छापा टाकला होता. खोलीत तब्बल सात लाख रुपयांचा गुटखा बेकायदेशीररित्या साठवून ठेवल्याचे आढळून आले. इतक्या मोठ्या प्रमाणात गुटखा कुठून आणला ? कुठे व कुणाला विकणार होते याचा शोध आता पोलीस घेत आहेत.
