नेशन न्यूज मराठी टीम.
कल्याण / प्रतिनिधी – कल्याण झोन 3 कोळसेवाडी आणि खडकपाडा पोलिसांनी एकाच दिवशी मोठी कारवाई करत ७ लाख १५ हजार रुपयाचा एमडी नावाच्या ड्रक्स सह चार आरोपींना अटक केली आहे. यात नायजेरियन सह इराणी महिलांचा समावेश आहे.
कल्याण पूर्व मधील १०० फूटी रोडवर नाकाबंदी दरम्यान एक रिक्षा पोलिसांना पाहून वळवली जात असल्याने पोलिसांना संशय आला. पोलिसांनी पाठलाग करत या रिक्षातील दोन तरुणांची अंग झडती करत तपास केला असता त्यांच्याकडे ५.६ ग्राम वजनाचा ३३ हजार ६०० रुपयाचा एम डी हा मादक पदार्थ सापडल्याने त्या दोघांना अटक करण्यात आली. या आरोपीकडे चौकशी केली असता त्यांनी नवी मुंबईतील इमेका जोसेफ इमेका या ४२ वर्षीय व्यक्तीकडून हा अमली पदार्थ खरेदी केला असून कल्याण पूर्वेत त्याची विक्री करणार असल्याचे सांगितले.
माहितीच्या आधारे कोळसेवाडी पोलिसांनी नवी मुंबईतील वाशी परिसरातून सदर नायजेरियन व्यक्तीला ताब्यात घेत त्याच्याकडील २७९ ग्राम वजनाचा ५ लाख ५८ हजार रुपये किमतीचा एम डी जप्त केला आहे.या तिघांनाही अटक करण्यात आली असून याच दरम्यान खडकपाडा पोलिसांनी आंबीवली परिसरात केलेल्या कारवाईत फिजा इराणी या महिलेकडे ३४ ग्राम एम डी जप्त केले या अमली पदार्थांची बाजारातील किंमत ६८ हजार रुपये इतकी असून या अमली पदार्थांची एकत्रित रक्कम ७ लाख १५ हजार रुपये इतकी आहे.कल्याणामध्ये प्रथमच इतकी मोठी कारवाई करण्यात आल्याची माहिती एसीपी कल्याणजी घेटे यांनी दिली आहे.पुढील तपास कोळसेवाडी पोलीस करत आहेत.
