नेशन न्यूज मराठी टीम.
नांदेड/प्रतिनिधी – डॉ शंकरराव चव्हाण वैद्यकीय महाविद्यालय व रुग्णालय येथील अधिष्ठाता डॉ श्यामराव वाकोडे व डाँ किशोर राठोड यांना खा हेमंत पाटील यांनी अमानुष व अपमानास्पद वागणूक दिल्याच्या निषेधार्थ आदिवासी, बंजारा व अनुसूचित जाती समाजाच्या वतीने नांदेड जिल्हाधिकारी कार्यालयावर निषेध मोर्चा आयोजित केला होता. या मोर्चात प्रमुख मागण्या होत्या खा हेमंत पाटील यांच्यावर अँट्राँसिटी कायद्या अंतर्गत गुन्हा दाखल झाला असून त्यांना त्वरित अटक करण्यात यावी ,खा हेमंत पाटील यांनी पदाचा गैरवापर करून डॉक्टरांना अपमानित करुन भेदभावपूर्ण वागणूक दिल्याने त्यांची खासदारकी रद्द करून त्यांना सहा वर्षासाठी निवडणूक लढविण्यास बंदी घालण्यात यावी.
त्याच बरोबर डॉ श्यामराव वाकोडे आणि किशोर राठोड यांच्यावर दाखल केलेला मनुष्यवंधाचा खोटा गुन्हा तात्काळ रद्द करण्यात यावा, डॉ श्यामराव वाकोडे व डॉ किशोर राठोड यांच्या जिवीतास धोका निर्माण झाल्याने त्यांना तात्काळ पोलिस संरक्षण देण्यात यावे, महाराष्ट्रातील अनुसूचित जमातीची रखडलेली विशेष पद भर्ती तात्काळ करण्यात यावी या मागण्यांसाठी आज जिल्हाधिकारी कार्यालयावर आदिवासी, बंजारा व अनुसूचित जाती समाजाचा भव्य निषेध मोर्चा काढण्यात आला या मोर्चात हजारो नागरिक उपस्थित होते.
