नेशन न्यूज मराठी टीम.
कल्याण / प्रतिनिधी – कल्याणच्या टिटवाळा – आंबिवली रिंगरोडवर राबवण्यात आलेल्या ग्रीन स्माईल उपक्रमाच्या माध्यमातून कल्याणकरांनी नविन इतिहास घडवला. इंडीयन मेडीकल असोसिएशन कल्याण, कल्याण संस्कृती मंच, केडीएमसी आणि आयुष हॉस्पिटलच्या माध्यमातून झालेल्या वृक्ष लागवडीसाठी पहिल्यांदाच शहरातील सामाजिक संस्था, प्रतिष्ठित नागरिक आणि सामान्य नागरिक एकत्र आले. आगामी रौप्य महोत्सवी गुढीपाडवा स्वागतयात्रेचे समन्वयक यांच्या संकल्पनेतून हा अनोखा उपक्रम राबवण्यात आला.
शेकडो नागरिकांचा उत्स्फूर्त सहभागातून रिंगरोडच्या टिटवाळा आंबिवली भागात आज सकाळी ग्रीन स्माईल उपक्रम राबवण्यात आला. या रिंगरोडवर तब्बल 2 किलोमीटरपर्यंत दोन्ही भागांत वेगवेगळ्या देशी प्रजातीच्या झाडांची रोपे लावण्यात आली. केडीएमसी आयुक्त तसेच डीसीपी यांच्यासह अनेक प्रतिष्ठित नागरिक, सामाजिक संस्था आणि 5 वर्षांच्या चिमुरडीपासून ते 90 वर्षांच्या आजीबाईंपर्यंत शेकडो नागरिक सहभागी झाले होते. तर काही मुंबई ठाण्यात स्थायिक झालेले माजी कल्याणकर नागरिकही यावेळी उपस्थित होते.
विशेष म्हणजे कल्याणकरांनी ही सर्व झाडे स्वखर्चातून लावली असून ती जगविण्यासाठीही विशेष खबरदारी घेण्यात आली आहे. प्रत्येक झाडाची देखभाल करण्यासाठी आयएमए कल्याणने विशेष संस्था नियुक्त केली आहे. तर आज ज्या व्यक्तींनी झाडे लावली त्यांच्या नावाचे बोर्ड त्या झाडांवर लावण्यात आले आहेत.
यावेळी उपस्थित मान्यवरांच्या हस्ते एकता मानव वृक्ष, डॉ. आनंदी गोपाळ यांच्या नावाचा, कोविडशी लढताना मृत्युमुखी पडलेल्या व्यक्तींची आठवण म्हणून आणि देश रक्षणासाठी बलिदान दिलेल्या सैनिकांप्रति कृतज्ञता म्हणून एक अशा पाच मानाच्या वृक्षांची लागवड करण्यात आली.
यावेळी केडीएमसीच्या सर्व पदाधिकारी आणि सदस्यांनी विशेष मेहनत घेतली. दरम्यान येत्या 17 डिसेंबर रोजी होणाऱ्या आयमेथॉन – 4 स्पर्धेच्या प्रोमो टी शर्टचे अनावरणही यावेळी मान्यवरांच्या हस्ते करण्यात आले.
