नेशन न्यूज मराठी ऑनलाइन टीम.
डोंबिवली/प्रतिनिधी – डोंबिवलीमध्ये फुले आणण्यासाठी निघालेल्या हारविक्रेत्या महिलेला निर्जनस्थळी नेऊन चाकूचा धाक दाखवत अल्पवयीन साथीदारांच्या मदतीने त्या महिलेचे सोन्याचे दागिने लुटल्याची घटना घडली होती. याप्रकरणी तक्रार दाखल होताच डोंबिवली रामनगर पोलिसांनी अवघ्या सहा तासात महिलेला लुटणाऱ्या रिक्षा चालक अनिल खिल्लारे याला बेड्या ठोकल्या आहेत.
मुख्य आरोपीसोबत त्याच्या अन्य तीन अल्पवयीन साथीदारांना ताब्यात घेण्यात आले आहे. डोंबिवली पूर्वेकडील आजदे गावात राहणारी तक्रादार महिला हार विक्रीचा व्यवसाय करते. 22 मार्च रोजी ही महिला डोंबिवली घरडा सर्कल येथून कल्याण एपीएमसी मार्केटच्या दिशेने जाण्यासाठी निघाली. ही महिला घरडा सर्कल येथे एका रिक्षात बसली. या रिक्षात रिक्षा चालकासह अन्य तिघेजण बसले होते. या रिक्षाचालकाने न्यू गोविंदवाडी बीएसयूपी इमारती जवळ रिक्षा थांबवली. रिक्षा चालकाने या महिलेला चाकूचा धाक दाखवत जीवे ठार मारण्याची धमकी दिली. याचवेळी मागे बसलेल्या दोन अल्पवयीन मुलानी फिर्यादी महिलेकडील सोन्याचे दागिने काढून घेतले.
या प्रकरणी महिलेने डोंबिवली रामनगर पोलीस ठाण्यात तक्रार नोंदवली होती. या तक्रारीनुसार पोलिसांनी तात्काळ तपास सुरू केला. गुन्हा दाखल झाल्यानंतर अवघ्या सहा तासात सदर गुन्हा उघडकीस आणण्यात डोंबिवली राम नगर पोलिसांच्या पथकाला यश आले आहे. महिलेला लुटणाऱ्या रिक्षा चालक अनिल खिल्लारे व त्याच्या साथीदारांना डोंबिवली रामनगर पोलिसांनी बेड्या ठोकल्या असल्याची माहिती एसीपी सुनील कुऱ्हाडे यांनी दिली आहे.
