नेशन न्यूज मराठी टीम.
बुलढाणा/प्रतिनिधी – अकोल्यावरून बुलढाण्यात आणून राजूरच्या घाटात आपल्या पत्नीला जीवे मारण्याचा पतीचा कट पोलिसांच्या सतर्कतेमुळे फसलाय. राजूरच्या घाटातील देवीच्या मंदिराजवळ पत्नीला मारत असताना पत्नीकडून आरडाओरडा केल्याने पोलीस चौकीवर उपस्थित असलेल्या दोन होमगार्ड आणि एक्सरसाइज करणाऱ्या दोन युवतींच्या सतर्कतेमुळे महिलेचे प्राण वाचले आहेत.
दरम्यान ह्या आरोपीला अटक करण्यात आली आहे. अटक करण्यात आलेल्या आरोपीचे नाव शेख इब्राहिम शेख चांद असे आहे. आरोपी शेख इब्राहिम शेख चांद याने संशयातून पत्नीस फारकत देण्याचे ठरविले व काल २३ ऑक्टोबरला दुपारी कागदपत्र आणायचे सांगून पत्नीला बुलढाण्याच्या राजूर घाटातील देवीच्या मंदिराजवळ आणले. त्यांनतर त्याठिकाणी ओढणीने गळा आवळला, यानंतर पत्नी ओरडल्याने परीसरात आवाज झाला. यावेळी पोलीस चौकीत असलेले होमगार्ड सोमनाथ वानरे, शुभम शेळके यांनी आवाजाच्या दिशेने धाव घेतली. यावेळी तेथून एक्सरसाइज करणाऱ्या दोन युवतींनी त्याच दिशेने धाव घेतली. यावेळी शेख इब्राहिम शेख चांद हा त्याच्या पत्नीचा गळा आवळून जीवे मारण्याचा प्रयत्न करत होता. मात्र, प्रसंगावधान राखत दोन्ही होमगार्ड आणि युवतींनी त्या महिलेचे प्राण वाचविले. व आरोपीला ताब्यात घेऊन त्याच्यावर पत्नीला जीवे मारण्याचा प्रयत्न केल्याने कलम ३०७ अन्वये गुन्हा दाखल करण्यात आला आहे.
