नेशन न्यूज मराठी टीम.
ठाणे/प्रतिनिधी – साहित्यरत्न लोकशाहीर अण्णाभाऊ साठे महामंडळाच्या वतीने राज्यातील अनुसूचित जातीतील नागरिकांसाठी 1 लाखापर्यंतची थेट कर्ज योजना सुरू झाली आहे, या योजनेसाठी 18 सप्टेंबर 2023 पर्यंत अर्ज करण्याचे आवाहन महामंडळाच्या जिल्हा व्यवस्थापक वंदना राणे यांनी केले आहे.
महाराष्ट्र राज्यातील अनुसूचित जातीतील मातंग समाज व त्यातील 12 पोटजाती मांग, मातंग, मिनीमादीग, मादींग, दानखणी मांग, मांग महाशी, मदारी, राधेमांग, मांग गारोडी, मादगी, मादिगा या पोटजातीतील 18 ते 50 वर्षे या वयोगटातील दारिद्रय रेषेखालील बेरोजगारांकरिता ही योजना लागू आहे.महामंडळाची 1 लाख रुपये प्रकल्प मर्यादा असलेली थेट कर्ज योजना मंजूर करण्यात आली आहे. या योजने अंतर्गत ठाणे जिल्ह्याकरिता सन 2023-24 या वर्षात 50 चे भौतिक उद्दिष्ट देण्यात आले आहे. यामध्ये ग्रामीण भागासाठी प्राधान्य राहील. राज्यस्तरावरील क्रीडा पुरस्कार प्राप्त व्यक्तींना तसेच सैन्य दलातील वीरगती प्राप्त वारसापैकी एका सदस्यास प्राधान्य देण्यात येईल.कर्ज योजनेच्या अर्जाकरिता खालील नमुद केलेल्या पात्रता व अटी / शर्ती व निकषांची पूर्तता करणारा अर्जदार पात्र राहील.
अर्जदार महाराष्ट्र राज्याचा रहिवासी असावा. मातंग समाज व त्यातील १२ पोटजातीतील असावा. अर्जदाराचे वय 18 ते 50 वर्ष असावे. अर्जदाराचा सिबील क्रेडीट स्कोअर 500 असावा. अर्जदाराने यापूर्वी महामंडळाच्या कोणत्याही योजनेचा लाभ घेतलेला नसावा. अर्जदाराचे वार्षिक उत्पन्न रु. 3 लाख यापेक्षा जास्त नसावे. एका कुटुंबातील एकाच व्यक्तीस सदर योजनेचा लाभ घेता येईल. व्यवसाय निवडला असेल त्या व्यवसायाचे ज्ञान व अनुभव / प्रशिक्षित असावा. महामंडळाच्या प्रचलित नियमानुसार व्यवसायास अनुरूप असलेली आवश्यक ती कागदपत्रे /प्रमाणपत्रे/ करारपत्रे / कर्जमागणी अर्जासोबत सादर करणे आवश्यक आहे.
कर्ज प्रस्ताव सादर केल्यानंतर महामंडळाच्या प्रचलित नियमानुसार मंजूरी संदर्भातील आवश्यक कार्यवाही करण्यात येईल. इच्छुक अर्जदारांनी महामंडळाच्या ठाणे येथील जिल्हा कार्यालयाच्या जिल्हा व्यवस्थापक, साहित्यरत्न लोकशाहीर अण्णाभाऊ साठे विकास महामंडळ, जिल्हाधिकारी कार्यालय, 5 वा मजला, ठाणे 400601. (दूरध्वनी क्रमांक 022-25388413) या पत्त्यावर दि. 18 जुलै 2023 ते 18 सप्टेंबर 2023 पर्यंत कार्यालयीन कामकाजाच्या दिवशी सकाळी 11.00 ते सायंकाळी 5.00 या वेळेत संपर्क साधावा, असे आवाहन महामंडळाच्या जिल्हा व्यवस्थापक वंदना राणे यांनी केले आहे.LikeCommentShare
