नेशन न्युज मराठी टिम.
ठाणे/प्रतिनिधी – मुंब्रा खाडी, कोपर खाडी व भिवंडी लगतच्या खाडीमध्ये गस्तीवर असलेल्या ठाणे व भिवंडी तहसील कार्यालयाच्या पथकाने आज अनधिकृत रेती उत्खनन करणाऱ्या 2 सक्शन पंप आणि 2 बार्जवर धडक कारवाई करुन या सक्शन पंप व बार्ज यांच्या इंजिनमध्ये साखर टाकून नष्ट करून पाण्यामध्ये बुडविले.
तसेच खाडी लगत असलेल्या रेती साठ्यासह 3 कुंड्या नष्ट करण्याची कारवाई केली. या कारवाईमध्ये अंदाजे 50 लाखांचा मुद्देमाल नष्ट करण्यात आला असल्याची माहिती जिल्हा प्रशासनाने दिली आहे.माहे जानेवारी व फेब्रुवारीमध्ये अनधिकृत रेती उत्खननावर ठाणे जिल्हाधिकारी कार्यालयामार्फत धडक कारवाई करण्यात येत असून मागील तीन आठवड्यामध्ये आठ कारवाया केल्या आहेत.
या कारवायांमध्ये 9 बार्ज, 7 सक्शन पंप, 20 ब्रास रेतीसाठा, 9 रेतीच्या कुंड्या / हौद नष्ट करण्यात आले. सदर साहित्याची एकूण किंमत 1.72 कोटी रुपये आहे. आजही मुंब्रा, कोपर व भिवंडी खाडीलगत कारवाई करून अवैध रेती उत्खनन करणाऱ्या सक्शन पंप व बार्जवर कारवाई करण्यात आली.जिल्हाधिकारी कार्यालयाने दि. 01 एप्रिल 2022 ते 13 फेब्रुवारी 2023 पर्यंत जिल्ह्यांतर्गत अनधिकृत गौण खनिज वाहनांच्या तपासणी मोहिमेदरम्यान 11,307 वाहनांची तपासणी केली असून आजपर्यंत आर्थिक वर्ष 2022-23 मध्ये एकूण 205 वाहनांवर दंडनीय कारवाई केली आहे. अनधिकृत गौण खनिज वाहन करणाऱ्या ट्रक मालकांकडून रू. 3 कोटी 01 लाख एवढा महसूल वसूल करण्यात आलेला आहे.अनधिकृत गौण खनिज उत्खनन व वाहन याच्यावर देखरेख ठेवण्याकरिता अद्ययावत “महाखनिज प्रणालीचा” वापर करण्यात येत असून त्याद्वारे छाननी करून अनधिकृत वाहनांवर कारवाई करण्यात येत असल्याचे जिल्हा प्रशासनाने कळविले आहे.
