नेशन न्युज मराठी टीम.
कल्याण – थकीत वीज बिलापोटी मीटर काढणाऱ्या महिला कर्मचाऱ्याला मारहाण करून मीटर हिसकावून नेल्याची संतापजनक घटना कल्याण पूर्वेतील मारवाडी चाळ येथे सोमवारी दुपारी घडली. यासंदर्भात कोळसेवाडी पोलिस ठाण्यात गुन्हा दाखल झाला असून पोलिसांनी आरोपीला अटक केली आहे.
मोहनदास करुनाकरण नायर (वय ५३, राहणार सरस्वती सोसायटी, ए विंग, कृपा कॉम्प्लेक्स जवळ, कल्याण पूर्व) असे अटक करण्यात आलेल्या आरोपीचे नाव आहे. काटेमानवली शाखेत कार्यरत वरिष्ठ तंत्रज्ञ सविता काटे या त्यांच्या सहकारी विद्युत सहायक पल्लवी टोळे यांच्यासह काटेमानवली नाका परिसरात वीजबिल वसुली व वीजपुरवठा खंडित करण्याचे काम करत होत्या. थकबाकीपोटी त्यांनी किरण लालवाणी यांच्या गाळा क्रमांक एकचा (मारवाडी चाळ, अय्यप्पा मंदिराजवळ, चिंचपाडा रोड) वीजपुरवठा खंडित करून मीटर काढले.
दरम्यान मोहनदास नायर या आरोपीने महिला कर्मचाऱ्यांना मीटर का काढले याचा जाब विचारत शिवागाळ केली. इतक्यावर न थांबता आरोपीने वरिष्ठ तंत्रज्ञ सविता काटे यांचे केस पकडून मारहाण केली व मीटर हिसकावून घटनास्थळावरून पळ काढला. यासंदर्भात काटे यांच्या फिर्यादीवरून कोळसेवाडी पोलिसांनी भारतीय दंड संहितेच्या कलम ३५३ व ३३२ (सरकारी कामात अडथळा, कर्मचाऱ्याला मारहाण करणे), ५०४ व ५०६ (धमकावणे), १८३ (वैध कारणाने सरकारी मालमत्ता ताब्यात घेण्यास विरोध) नुसार मोहनदास नायर विरुद्ध गुन्हा दाखल करून त्याला अटक केली आहे. पोलिस उपनिरिक्षक मल्लिनाथ डोके या गुन्ह्याचा तपास करत आहेत.
