नेशन न्यूज मराठी टीम.
कल्याण/प्रतिनिधी – खेळाडूंनी कोणतेही आर्थिक किंवा मानसिक दडपण न ठेवता निश्चित मनाने सर्वोत्तम कामगिरी करावी आणि आगामी गुजरात येतील राष्ट्रीय क्रीडा स्पर्धेत महाराष्ट्राच्या सर्वसाधारण विजेतेपद मिळवून राज्याचा नावलौकिक उंचवावा, असे आवाहन महाराष्ट्र ऑलिम्पिक असोसिएशनचे अध्यक्ष अजित दादा पवार यांनी खेळाडूंना मार्गदर्शन करताना केले.
आगामी गुजरात येतील राष्ट्रीय क्रीडा स्पर्धांसाठी शिवछत्रपती क्रीडा संकुल, म्हाळुंगे-बालेवाडी, पुणे येथे महाराष्ट्राच्या विविध संघांचे प्रशिक्षण शिबिर सुरू आहे. या संघांना महाराष्ट्र ऑलिम्पिक असोसिएशनतर्फे पवार यांच्या हस्ते शुभेच्छा देण्यात आल्या. यावेळी महाराष्ट्र ऑलिम्पिक असोसिएशनचे महासचिव नामदेव शिरगावकर आणि राज्याचे नवनियुक्त क्रीडा आयुक्त डॉ. सुहास दिवसे हे उपस्थित होते.
पवार यांनी पुढे सांगितले की, महाराष्ट्राच्या संघांकरिता सव्वाचार कोटी रुपयांची यापूर्वीच तरतूद करण्यात आली आहे. खेळाडूंना आणखी काही मदत लागली तरी त्यासाठी आम्ही शासनाकडे त्वरित संपर्क साधून हा निधीही मिळवून देऊ. राष्ट्रीय क्रीडा स्पर्धेतील पदक विजेत्यांना भरघोस रोख पारितोषिके आणि शासकीय नोकऱ्यांमध्ये संधी उपलब्ध केली जाणार आहे. त्यामुळे खेळाडूंनी आत्मविश्वासाने आणि सकारात्मक वृत्ती ठेवून विजेतेपद मिळवण्यावरच लक्ष केंद्रित करावे. येथील शिबिरात अव्वल दर्जाच्या सुविधा आणि प्रशिक्षकांची व्यवस्था करण्यात आली आहे त्यामुळे महाराष्ट्राचे खेळाडू सर्वोच्च यश मिळवतील अशी मला खात्री आहे.
छत्रपती शिवाजी महाराजांनी सुरतहून सोन्याचा खजिना लुटून आणला होता. आता महाराष्ट्राच्या खेळाडूंनी गुजरातमधून सोनेरी पदकांची लयलूट करावी, असे सांगून डॉ. दिवसे म्हणाले.
सर्वोत्तम सुविधा सवलती अव्वल दर्जाचे प्रशिक्षण याच्या जोरावर महाराष्ट्राचे खेळाडू आगामी राष्ट्रीय क्रीडा स्पर्धेत पदक तालिकेत प्रथम स्थान मिळवतील, असा आत्मविश्वास शिरगावकर यांनी व्यक्त केला.
यावेळी राज्याचे क्रीडा सहसंचालक चंद्रकांत कांबळे तसेच महाराष्ट्र ऑलिम्पिक असोसिएशनचे खजिनदार धनंजय भोसले व इतर पदाधिकारी तसेच क्रीडा विभागाचे वरिष्ठ अधिकारी आणि अनेक क्रीडा मार्गदर्शक उपस्थित होते. या समारंभातच महाराष्ट्राच्या विविध संघांच्या कर्णधारांचा सत्कार करण्यात आला.
