नेशन न्यूज मराठी ऑनलाइन टीम.
नंदुरबार/प्रातिनिधी – खानदेशातून नंदुरबार कृषी उत्पन्न बाजार समितीत कृषीमालांची मोठ्या प्रमाणावर आवक होत असते. मिरची, कांदा, कापूस, धान्य, भाजीपाला खरेदी विक्रीतून बाजार समितीला फायदा झालेला आहे. यंदा नंदुरबार कृषी उत्पन्न बाजार समितीला 5 कोटी रुपयांचे रेकॉर्ड ब्रेक उत्पन्न मिळालेले आहे. त्यातून 1 कोटी 68 लाख रुपयांच्या नफा झालेला आहे. प्रथमस्थानी सर्वसामान्य शेतकरी हित लक्षात घेऊन घेतलेले निर्णय आणि शेतमजूर, संचालक मंडळ, अधिकारी कर्मचारी तसेच व्यापारी त्यांच्या सहकार्यातून हे शक्य झाल्याचे सभापती विक्रमसिंग वळवी यांनी सांगितले.
1 एप्रिल 2023 ते 31 मार्च 2024 अखेर 5 कोटी 36 लाख 54 हजार 193 रुपयांचे विक्रमी उत्पादन मिळाले. त्यातून 3 कोटी 67 लाख 86 हजार 763 रुपये खर्च झाला असून,1 कोटी 68 लाख 67 हजार 430 रुपये घसघशीत नफा मिळालेला आहे. परिसरात कांदा व मिरची तसेच अन्य मालांचे मोठ्या प्रमाणावर शेतकऱ्यांकडून उत्पादन घेण्यात आल्यामुळे बाजार समितीत दररोज शेतमालाची मोठ्या प्रमाणावर आवक होत होती. त्याच्या परिणाम म्हणून घसघशीत उत्पन्न मिळाल्याचे बाजार समिती प्रशासनाकडून सांगण्यात आले.
मागील काही काळ सोडला तर गेल्या अनेक वर्षांपासून कृषी उत्पन्न बाजार समितीत आमच्या गटाची सत्ता आहे. संचालक मंडळाचे सुयोग्य नियोजन, काटकसर शेतकरी हिताचे घेतलेले निर्णय व शेतमजूर, हमाल-मापाडी, व्यापाऱ्यांचे अनमोल सहकार्यातून बाजार समितीला चांगले दिवस आले आहे. भविष्यात अजून शेतकरी हिताचे निर्णय घेऊन बाजार समितीला कश्या प्रकारे लाभ मिळेल यासाठी योग्य निर्णय घेण्यात येतील असे सभापती विक्रमसिंग वळवी यांनी सांगितले.
