नेशन न्यूज मराठी टीम.
कल्याण/प्रतिनिधी – देशभरात गुन्ह्यांची शंभरी पार केलेल्या आणि मोक्का कायद्याअंतर्गत चार गुन्ह्यातील पाहिजे असलेल्या सराईत इराणी आरोपीस धारवाड, कर्नाटक येथुन अटक करण्यात कल्याणच्या खडकपाडा पोलिसांना यश आले असून कासीम मुख्तार ईराणी उर्फ तल्लफ, वय २४ वर्षे, रा. आंबिवली असे या आरोपीचे नाव आहे. त्याच्यावर जबरी चोरी (चेन स्नॅचींग), मोटारसायकल चोरी तसेच खुनाचा प्रयत्न असे तब्बल शंभर गुन्हे देशभरात दाखल आहेत.
ठाणे शहर, मुंबई शहर, नवी मुंबई तसेच परीसरात चेन स्नॅचींग, जबरी चोरी तसेच वाहन चोरीचे गुन्हे घडत असतांना हे गुन्हे उघडकीस आणण्याबाबत वरीष्ठांकडुन आदेशीत करण्यात आले होते. खडकपाडा पोलीस स्टेशनमध्ये विविध गुन्हयातील पाहीजे असलेला आरोपी कासीम मुख्तार ईराणी उर्फ तल्लफ याने परिसरात चेन स्नॅचींग, जबरी चोरी तसेच वाहन चोरीचे गुन्हे करुन धुमाकुळ घातला होता. हा आरोपी नेहमी जागा बदलुन राहत असल्याने त्याचे ठावठिकाण्याबाबत निश्चीत माहिती मिळत नव्हती.
खडकपाडा पोलीस ठाण्यास हा आरोपी धारवाड, कर्नाटक येथे असल्याबाबत माहिती मिळताच खडकपाडा पोलीस ठाण्याचे पथक धारवाड, कर्नाटक येथे रवाना करण्यात आले होते. इंदिरानगर, आझाद रोड, अलनवर, जि. धारवाड, कर्नाटक येथे एका घरामध्ये आरोपी कासीम मुख्तार ईराणी हा असल्याचे समजताच ७ जुलै रोजी पहाटे ४ वाजण्याच्या सुमारास सपोनि अनिल गायकवाड व पथक यांनी आरोपी असलेल्या घराच्या भोवती स्थानिक पोलीसांचे मदतीने सापळा रचला. आरोपीने घराचे कौले उचकटुन, शेजारील इमारतीचे गच्चीवरुन उडया मारुन पळून जाण्याचा प्रयत्न केला. त्यावेळी पथकाने आरोपीचा पाठलाग करुन शिताफिने त्यास ताब्यात घेतले. त्यावेळी झालेल्या धावपळीत तीन पोलीस अंमलदार किरकोळ जखमी झाले.
अटक करण्यात आलेल्या कासीम ईराणीकडे चोरी केलेल्या ५ मोटारसाकल तसेच एक अग्निशस्त्र हस्तगत करण्यात आले असून त्याच्यावर १०० पेक्षा जास्त गुन्हे दाखल आहेत. तसेच मोक्का कायद्याअंतर्गत चार गुन्हयातील पाहिजे आरोपी असुन इतर २५ ते ३० गुन्ह्यांमध्ये तो पाहिजे आरोपी आहे.
हि कौतुकास्पद कामगिरी पोलिस उपायुक्त सचिन गुंजाळ, सहा. पोलीस आयुक्त कल्याणजी घेटे यांच्या मार्गदर्शनाखाली खडकपाडा पोलीस ठाण्याचे वरीष्ठ पोलीस निरीक्षक सर्जेराव पाटील, पोलीस निरीक्षक शरद झिने, नंदकुमार केंचे, तपास पथकाचे अधिकारी सपोनि अनिल गायकवाड, व तपास पथकाचे अंमलदार सहा. पो.उप निरी. मधुकर दाभाडे, अशोक पवार, जितेंद्र ठोके, संजय चव्हाण, पोहवा नवनाथ डोंगरे, जितेंद्र सरदार, संजय चव्हाण, राजु लोखंडे, संदिप भोईर, योगेश बुधकर, सुधीर पाटील, पोशि राहुल शिंदे, नवनाथ बोडके, अनंत देसले, कुंदन भाचरे, अविनाश पाटील यांनी केली आहे
