नेशन न्यूज मराठी ऑनलाईन टीम.
नाशिक/प्रतिनिधी – वन्यजीव तस्करी ही जागतिक स्तरावरील डोकेदुखी बनत चालली असून सुरक्षा यंत्रणा आणि आधुनिक तंत्रज्ञान यांच्या प्रयत्नानंतरही त्यावर अद्याप पूर्णपणे नियंत्रण करता आलेले नाही. जगात दुसऱ्या क्रमांकाची तस्करी ही वन्यजीवांची होत असून काळी जादू औषध,सौंदर्य आणि इत्यादी प्रसाधनांच्या निर्मितीसाठी या वन्यजीवांना आपला जीव गमवावा लागतात.
नाशिक जिल्ह्यातून घोरपडीच्या पुरुष प्रजनन अवयवांची तस्करी झाल्याची घटना समोर आली आहे. वन्यजीव तस्करांची एक टोळी घोरपडीचे पुरुष प्रजनन अवयव आणि मृदू प्रवाळ यासाठी संभाव्य खरेदीदार शोधत असल्याची गुप्त माहिती डीआरआय अर्थात महसूल गुप्तचर संचालनालयाला मिळाली होती. या गुप्त माहितीनुसार डीआरआय मुंबईच्या अधिकाऱ्यांच्या पथकाने तस्करांना पकडण्यासाठी योजना आखली. तस्कराने खरेदीदाराला नाशिक जिल्हातील नांदगाव रेल्वे स्थानकाजवळ बोलावले. मात्र सुमारे तीन तास त्यांचे स्थान बदलणे सुरू होते. डीआरआयचे पथक त्यांच्यावर पाळत ठेवून होते. तस्कराने शेवटी चारचाकी जाऊ शकणार नाही असे दुर्गम आदिवासी वस्तीतले काटेरी झुडपे असलेले कठीण ठिकाण ठरवले. टेहळणीसाठी तस्करांनी संपूर्ण परिसरात 3-4 गस्ती पथके ठेवली होती. डीआरआयच्या पथकाने ओळख लपवण्यासाठी आंबेडकर जयंतीचे औचित्य साधत आपल्या वाहनांवर निळे झेंडे लावले. त्यामुळे इतर वाहनांमध्ये त्यांची वाहने मिसळून गेली. तस्करांनी विक्रीसाठी माल काढताच डीआरआयच्या पथकाने त्यांच्या दिशेने धाव घेतली. पण बाईकवरच्या टेहळणी गटाने त्यांना अडवले. तस्कर सतर्क झाले आणि क्षणार्धात तीस जणांच्या समूहाने डीआरआयच्या पथकाला घेरले. त्यांनी अधिकाऱ्यांवर दगडफेक करायला सुरुवात केली. या संधीचा फायदा घेऊन तस्कर आणि त्याच्या सहाय्यकांनी मालासकट पळ काढण्याचा प्रयत्न केला. मात्र अधिकाऱ्यांनी अत्यंत दुर्गम परिसरात अर्धा किलोमीटरपर्यंत त्यांचा पाठलाग केला आणि तस्करांना ताब्यात घेतले.
डीआरआय च्या पथकाने वन्यजीव संरक्षण कायदा 1972 च्या सूची -I अंतर्गत, सूचीबद्ध 781 हत्था जोडी आणि 19.6 किलो मृदू प्रवाळ जप्त केले आहे. जप्त केलेल्या जंगली वस्तू आणि ताब्यात घेण्यात आलेल्या व्यक्ती वन्यजीव संरक्षण कायद्याअंतर्गत पुढील कारवाईसाठी महाराष्ट्र राज्य वनाधिकाऱ्यांकडे सुपूर्द करण्यात आल्या. नाशिक जिल्ह्याच्या दुर्गम परिसरात करण्यात आलेली ही कारवाई वन्यजीवांशी संबंधित गुन्ह्यांना पायबंद घालण्यासाठीची डीआरआयची प्रतिबद्धता दर्शवते.
