नेशन न्यूज मराठी टीम.
अहमदनगर / प्रतिनिधी – शासकीय रुग्णालयात सध्या मृत्यूने थैमान घातले आहे. शासकीय रुग्णालयातील गलथान कारभार यानिमित्ताने नागरिकांसमोर येत आहे. नांदेड, संभाजीनगर, नागपूर व या पूर्वी ठाणे येथील शासकीय रुग्णालयात औषधांचा तुटवडा व आवश्यक ते डॉक्टर व कर्मचारी स्टाफ नेमला नसल्याने ,लहान बालकांचे मृत्यू झाले आहेत. हे मृत्यू म्हणजे सरकारी अनास्थेचे बळी असून राज्याचे आरोग्यमंत्री व मुख्यमंत्र्यांनी राजीनामा द्यावा व दोषींवर कारवाई करण्यात यावी अशी मागणी भारतीय कम्युनिस्ट पक्षाचे राज्य सेक्रेटरी ॲड सुभाष लांडे व राज्य कौन्सिल सदस्य डॅा संजय नांगरे यांनी केली आहे.
शासकीय रुग्णालयात आवश्यक त्या सुविधा उपलब्ध न करता सर्व सामान्य माणसांना मृत्यूच्या खाईत लोटले जात आहे. सार्वजनिक आरोग्य व्यवस्था खाजगीकरणाचा सरकारचा हा डाव असून जनतेने सरकार चा हा डाव उधळून लावला पाहिजे व सार्वजनिक आरोग्य व्यवस्था मजबूत करण्यासाठी एकत्र यावे असे आवाहन करून भारतीय कम्युनिस्ट पक्ष व लाल बावटा रिक्षा युनियन च्या वतीने आज शेवगाव येथे नांदेड, संभाजीनगर, नागपूर येथील शासकीय रुग्णालयात मृत्यूमुखी पडलेल्या बालकांना व नागरिकांना श्रद्धांजली अर्पण करण्यात आली व सरकार च्या विरोधात जोरदार घोषणाबाजी करत निदर्शने करण्यात आली
